حيه طنين الهاتـف اللـي بـه اعـلان = مكتـوب فالشاشـة لديكـم رسـايـل
فكيتهـا واليـا زبــاد(ن) وريـحـان = مضمونهـا نبـض القلـوب المثـايـل
حمـود مرسلهـا بترتـيـب وتـقـان = يشرح ونا فـي ضامـري لـه دلايـل
يقـول فيهـا الوقـت غربـة وعنـوان = والعمـر طرقـه والتجـارب رحـايـل
وحنا ثنين اخوان واكثـر مـن اخـوان = لـو مـا تجمعنـا عـروق وسـلايـل
ومـرات ربـي يرزقـك خـوة انسـان = واحـد ويسـوى فـي عيونـك قبايـل
بيتيـن لكـن ثـورة الصـدر بركـان = اعرف مقامـي عنـد ذخـر الحمتيـل
أي والله انـي فيـك افاخـر وكسبـان = ياكبـر حـب(ن) فـي حنايـاي شايـل
فللي سـواة حمـود مانـي بخسـران = عشيـر طيـب وكـل عرفـه جمايـل
دايـم جنـابـه للمسايـيـر فـرحـان = اليـوم وقـت اليـوم مثـلـه قـلايـل
حلـون نبـاه ولاتجـي زلـة السـان = دايـم يـجـدد للصـديـق الهـلايـل
لـن طالـت الرفقـه تجـدد كحيـلان = ماهـوب خمـام العـلـوم المعـايـل
خاويت ابو ماجـد علـى كـل نيشـان = انا اشهـد انـه عنـدي مـن الاوايـل
وجـه سخـي وده يشيلـك بالامـتـان = وودك تنـولـه عـيـونـك نـوايــل
وخاويت مـن ربعـه مشاكيـل طنيـان = روس القروم وماحـوت مـن صمايـل
مثل المسمـى صاحبـي بـن رشيـدان = وابو جهـز شـلاح ضـاف الخصايـل
ياطيبهـم ياليـت الاثنـيـن جـيـران = النـا يابـو ماجـد تـر العمـر زايـل
ولـو المـراد الشعـر فالـرد بيـتـان = لكـن معنـاهـن جــزال الجـزايـل
للطيبيـن بمهجتـي صــرح بنـيـان = احبهـم وارجـي هـطـول المخـايـل
وجت لي علـى ماقيـل فكـة لبيبـان = تفضلـوا شوفـوا وش القلـب شايـل
نحبكـم حـبـن تخـلـده الازمــان = ياهل العقال اللي علـى الـراس مايـل
ونشوف حب قلوبكـم شـوف الاعيـان = النـا وتــزداد المحـبـة شمـايـل
حنـا هـل الهيـلا اليـا قيـل عتبـان = ونتـم طنايـا المـوت والعـزم طايـل
وحنا اشهرين(ن) من ورى الحول مزبان = دخيلنـا نلطـم عنـه كــل عـايـل
وانتم اليـا دارت رحـى كـل ميـدان = الله يكـافـي شـركــم فالـنـزايـل
وحنا مدلهـة الخـوي عـن الاحـزان = خويـنـا ارقابـنـا لــه عـدايــل
وانتم علـى ماقيـل خطـلان الايمـان = خطـلان الايـدي ميبسيـن البـلايـل
وحنـا اليـا ثـور عجاجـن ودخــان = نطعـن لعيـن اللـي تهـل الجـدايـل
وانتـم الياطـن الطلـب كـل ديــان = مـا تنثـنـون الا بقـلـع الاصـايـل
وحنا هل الفزعـة مـن اول اليـا الان = ناخـذ مـن قسـوم الفـزوع الجلايـل
وانتـم مصخـرة القبايـل لـلاذعـان = اخذتـو الجـزيـة بـقـوة زحـايـل
مـن فعلكـم يامخزيـة كـل شيطـان = رجحتـوا الوزنـة اليـا كـال كـايـل
هـذا كـلام الصـدق مافيـه بهـتـان = ومن ينكره يصبح عن الصـدق عايـل
والعـز للـي ثبتـوا خمـس الاركـان = عـزوة هـل العوجـا كمـال الكمايـل
اللي سعـوا بالديـن والعـدل ميـزان = من عقب ماهـي بيـن صايـل وجايـل
ولاهمب خـس(ن) فالقبايـل ونقصـان = لالا وربــي لـكـن الامــر هـايـل
نحبكـم يامذهـلـة كــل عمـسـان = جايـن لوقـع القـاع تحتـه فعـايـل
صحيـح جايـن بيننـا عـدة اكـوان = والـدم بيـن جدودنـا قـبـل سـايـل
لكـن والله ثــم والله لـكـم شــان = شـان(ن) تعـلا لنـجـوم القـوايـل
ياما قضعتـوا فالملاقـا مـن احصـان = وياما ستر فـي ضفكـم مـن عوايـل
وياما اندلق سمـن الكرامـة ببـرزان = يصيح اجـا وتصيـح للضيـف حايـل
عان العليم اللـي الياقبلـت لـك بـان = بوسط النفود ابـا انشـده كيـف قايـل
تلقـا جنوبيـه بنـي فـيـه ديــوان = لضيف لـو مـا حولـه الـزول زايـل
اقلـط وتلقـا اربــع دلال رســلان = ومكمـلات(ن) مـن جميـع الوسايـل
زرع اليمن والهيـل بـه عـدة الـوان = مكمـل الحسيـة وفـرشـه زلايــل
اقلط معزب ضيـف وش قلـت يافـلان = وشوي واليا مجلـس الضيـف ضايـل
جوك الرمـال وكلـن اقسـم بالايمـان = طـاح العشـا والـدول جالـه دوايـل
لو جيت اطيع القـاف ريـض بقيفـان = مـاوالله اوفــي حقـهـم بالمثـايـل
نبـا السوالـف تـدرج درج ربـحـان = نلقـا مـع الحضـار ربـح وشهايـل
وياحاتم الطائي تـرى ذخـرك اعيـان = مـال القبايـل فـي كرمهـم مثـايـل
يالله عسـى شمـر تعـزه بـالاوطـان = لا يابعـد حيـي عــراب السـلايـل

بديت ذكر الله على كـل مـا كـان = المعتلي منشي صـدوق المخايـل
الواحد اللي خالق(ن) جن وانسـان = الرازق اللـي يطلبـه كـل سايـل
ابديت ما كنيت يوم الخفـي بـان = باح الكنين وجبت زيـن المثايـل
صغت المثايل صوغ لولو ومرجان = مثايلـن مـا قالهـن كـل قـايـل
وزنت منظـوم المثايـل بميـزان = طرايفن ياحمـود ماهـن هزايـل
مثايلـن تهـدا لمثلـك بالامكـان = ياحمـود ياكسـاب كـل النفايـل
تمدح وكلن يمدحك سـر واعـلان = ماتنمدح ياحمـود لـولا الفعايـل
يفداك ياريف المهاجيـف كوبـان = ياهديب ياللي لثقل الحمـل شايـل
الطيب يدرابـه والافعـال برهـان = الطيـب كايـد والفعايـل دلايــل
والناس من دور الصحابة اليا ذلان = تذكـر فعـول الطيبيـن الاوايـل
يالله ياللي فارض(ن) خمس الاركان = انـك تعـز مجربيـن الفضـايـل
ياحمود سلم لي على طير حـوران = الليث بن صنهات واف الخصايـل
محمد(ن) واف الخصايل كحيـلان = راع الفـا مـن طيبيـن الحمايـل
نعم(ن) الياقالوا هل المجد عتبـان = ذباحة الحايـل سطـام(ن) لعايـل
عتيبـة الهيـلا قبايـل وعربـان = فكاكة المضعـون ستـر الحلايـل
ياقطبة سـرد السبايـا بالاكـوان = هل الفعايل يـوم صايـل وجايـل
نزالة الخرم المطـرف بالاضعـان = مدهال عربان(ن) من الوسم سايـل
ياقيل وين افـلان وفـلان وفـلان = ركبو عتيبه فوق سـرد الاصايـل
نطاحة الكايـد بخفقـات الاذهـان = بافعال يامحمد صحيح(ن) صمايـل
مزبان مضهود(ن) عليه الدهر شان = زبن الدخيل اللي به الوقـت مايـل
ريف الخوي والجار ذباحة الضـان = زمل التخوت اللي تشيـل الثقايـل
عتيبه وشمر يافتى الجـود خـلان = ياطير شلوى بيننـا الشـك زايـل
افداك يامحمد ونـا فيـك كسبـان = مكسب وفا ماهوب مكسب حبايـل
يالنادر الهيلـع الياضـم جنحـان = ذباح اليامن طالـع الجـول جايـل
فيك المزوه والحميـه والاحسـان = يارعي النخوه لـك البـاع طايـل
اطول من الضلع الطويل ام سلمان = ضلع(ن) تعرفه كل سمـو القبايـل
يالشهم يالمسطور يالسيف شامـان = يالطيّب اللي مثـل طيبـك قلايـل
انا على شوفتك شفـق(ن) ولهـان = وصلك هوى بالي بكـل الوسايـل
واقبل سلامـي عـد ماهـل ودان = واعداد ما وادي(ن) من الوبل سايـل
واعداد ما تومي الهبايب بالاغصـان = واعداد ما سـارت لمكـة رحايـل
اهدي سلامي لك وربعك والاخـوان = وعلى عتيبـه مدركيـن الجمايـل
ياجار ابو ماجد على النعم جيـران = جيرة وفا ماهـي بجيـرة فسايـل
لايبعـد قربـة خنيفـس وخنّـان = المفسديـن مخربـيـن العمـايـل
كلن شكى جاره على غير وجـدان = اللي على فرقـا قصيـره يحايـل
ياللي لكم بالمجد مركـز وعنـوان = هـل الفعـول الطيبـات الجزايـل
حمود من شمر هل المجد والشـان = نطاحة الكايد حمـا سـور حايـل
شجعان ياركبوا على الخيل فرسان = حريبهـم ذاق الكـدر والغـلايـل
هل الثنا والجود حضر(ن) وبـدوان = اهل هلا ماهـم هـل(ن) للحبايـل
ومحمد(ن) من ساس طلقين الايمان = عتيبـة الهيـلا حمـات الدبايـل
يوم المدارك والمعـارك بالاوطـان = مرويـن حـد مصقـلات السلايـل
لهم بميدان الوفا سـاس واتقـان = ساس الوفا ماهو عن الحق عايـل
محمد(ن) وحمود للمجـد عنـوان = ومجدديـن(ن) مجدهـم بالرسايـل
جيران بالمنزل وبالفعـل صدقـان = اوي صدقـان(ن) تعـز النـزايـل
نفخر بكم فخرن تصـوه الاذهـان = حب الفـا ماهـو محبـة هوايـل
لولا التعارف والتقـارب والايمـان = ما صار بين الخلق حـب وصايـل
قريت يامحمـد لكـم قيـل قيفـان = مشكور يامن جاب زيـن المثايـل
صوغات مهديهن بتقدير واذعـان = ما بيت عن بيت(ن) من القيل عايل
انت الاديب ان صار للقيل ميـدان = يعـل مـا نعتـاظ غيـرك بدايـل
يامحمد اللي صار للمجـد عنـوان = الله يفكك مـن شـرور امتحايـل
واقبل مرد القيل لو فيـه نقصـان = الكامـل الله وافـي(ن) بالكمايـل
وصلاة ربي عد مـا يسمـع آذان = على النبي اعـداد مـا زال زايـل