بسم الله الرحمن الرحيم

بعد الفقر حطيت لي شريحه وجوال = يسعد مسا جوالها والشريحه
كانت تجيني تشتكي قلة المال = وتصيح لاجاء طاري الفقر صيحه
تقول أبويه دايم الدوم رحال = وأمي كبيرة سن دايم طريحه
وأنت الوحيد اللي لك القلب ميال = دايم يصاريحني وأنا له صريحه
طفله وأنا معشوقها بين الأطفال = جريح حب وطاح له في جريحه
كنا سوى نرسم على التربه آمال = وأحلام تقتلها الحياة الشحيحه
كم دمعةٍ كانت على الخد تنهال = وإذا نزلت ضاقت عليه الفسيحه
الله كم صرخه .. وهمسه .. وموال = الله كم جادت علينا القريحه
الله كم بيتٍ كتبناه يختال = وأقول أنا ضيدان وإنتي مليحه
نخيل لو ما بالسماء برق وخيال = ونكذب الأيام لو هي صحيحه
تقول الحطيت لك بشت وعقال = وسخر لك الرحمن عشيه مريحه
أخاف تتركني على عثرة الفال = للفقر ووجيه الحياة القبيحه
وحبيتها من بين كل الخلايق والازوال = حبٍ بطول الوقت محدٍ يزيحه
وسلمتها قلبٍ تباريه الأهوال = وطاح الخفوق وطيحة القلب طيحه
راحت وخلتني مع القيل والقال = شاعر صواديف الدهر تستبيحه
ودار الزمان وغير الحال بالحال = وجاها الزمان بكل ورده وشيحه
فله .. وخدامه .. ولكزس .. وجوال = وأنا عجزت أدفع رسوم الشريحه