على المطرف والموالي من نظيفين القلوب= اثني سلامي عد ماهز الهواء غصن شجره
الشمس تغرب فالبحر وسهيل يبدي من جنوب= والسيف وسم العز في انصابه وبطنه وظهره
يالشاعر اللي جيتنا من شرق تدفعك الهبوب= يامرحبا مالاح برق الصيف وانهل امطره
الشمس تطلع مير تاليها تعود للغروب= والسيف وقع في صفىً قاسي وعاجه وكسره
بيني وبين عيال مفلح كلهم سيلٍ جذوب =لولا غلاهم طال عمرك ماحجزت التذكره
لا تحسب ان تفريق خلق الله مثل جمع الذنوب= والموت متقفيك والمسجد بجنب المقبره
يابو محمد مانقول انك صدوق ولا كذوب =الله يبارك بالشراب اللي يبل الحنجره
ياصاحبي لا ترشد الشعار لين انك تتوب =دايم تحدث وانت بين الميمنه والميسره
يازينها لا جات علمٍ غانم ومشلح وثوب= وان عًدمت فالميت اصله كلب والناعي مره
انته تجاهلنا وتطعن بالقبايل والشعوب= ماتدري انا لا كسرنا العظم محدٍ جبره
جاين على رغبتك يالقرقاح منته بمغصوب= واللي ورد عد الروى ربك يسمح مصدره
انتم بني قحطان لا شمر ولا انتم بالحروب= واللي حدر هاك السنين الماضيه في محدره
ماني ببيها طال عمرك لا غسول ولا شروب =الخير واجد ياعتيبه وابرد الثلج اكبره
حنى بني قحطان تاج المدح والنار الشبوب= وارماحنا في محزم الرجال والا منحره
ركبو ثنين الطايره واثنين مالقيو ركوب =الله يعين الحاجزين وقاطعين التذكره
حنى عتيبه من وحمنا يالع الضلع ويذوب= تحمد الله ياعبيدي يوم منته بحجره
انته صحيبك خزن الارقام في بطن الحاسوب= اثره يحاول يقهر العالم عسى الله يقهره
الحمد لله هيبتي في كل فج وكل صوب= وانته تحاول تقلب الدنيا على قرن بقره
يامدفع الاعياد ليه اهل الحسا سموك طوب= مافيه غير الملح ياجعل القنابل تفجره
عدونا ينحاش يالقرقاح وصياحه طنوب =حنى عمود الدين والمسلم يبا الله ينصره
اللي تزعله البياله ربما يرضيه كوب= والمدفع اللي قلت مايقدر يحركه اعشره