القلب يحزن والدموع تسيل=والعين تسهر والغياب طويل
الفاجعه قضت مفاجع جنوبنا=الهم يكبر والفؤاد عليل
حوادث الدنيا كفا الله شرها=يصبح بها الحمل الخفيف ثقيل
علم ضحى الاثنين بالحيل راعنا=روعة خليل من فراق خليل
نهارنا شمسه خبت في غيومها=نصف النهار وكنها في ليل
غيبه فهد عنا مصاب مصيبنا=عسى النساء عقب الغريب تحيل
يارب ترحمنا وتلطف بحالنا=ماعاد فينا غير حيلك حيل
بالصبر والسلوان يارب مدنا=اجعل لنا على رضاك سبيل
تجبرعزانا في ملكنا زعيمنا=عساه بجنان النعيم نزيل
مرحوم يامن راح تشعب ركايبه=بدار الفنا عقب المقام رحيل
نذكر مواقف من ثبت في مواقفه=رجل الهدى للضايعين دليل
نعد ونضيع حصايل مناقبه=ونجيب من فيض الكثير قليل
مآثره تبقلى ونلقا ظلالها=في القيظ عن لفح السموم مقيل
رجل البنا رجل الثنا في زعامته=زعامه فيها عطاه جزيل
من ربع قرن وقايد العرب مرتكي=للنايبات وللحمول يشيل
شيال حمال اللي تثنت قوايمه=بارك ومن مس الشداد هزيل
للواجبات منفذ عن سواعده=سيف على حسم الامر صقيل
غيث على الممحل غيور على الوطن=ماعال وان عال الخصيم يعيل
موت ليا زمجر حياه ليا ابتسم=يسف بافواه العداه مليل
يوم اعتداء الغاشم وحول بجارته=قال انت يا هذا الغشيم هبيل
هي جارتي واقف على الرجل دونها=وانا لها بعد الوكيل وكيل
رد الحقوق وصبها في مسارها=فعل الاصيل من الجدود اصيل
قال انعمي ياكويت بالمن واعمري=وانا وراك ومن غزاك ذليل
نادا باهل لبنان والحرب دايره=حرب جنوا منها دمار وويل
جمع طوايفهم وحدد قرارهم=للصلح بالطايف ولادة جيل
في قبه الصخره وللقدس فزعته=يوم اختفاء دون العميل عميل
ماغض عن محنه فلسطين ناظره=يجمع لهم رجل السلام حصيل
وفي البوسنه والهرسك احكم سياسته= عن خوفها جاب الامان بديل
آمن محارمها وحصن حدودها=للمعضلات المقبلات قبيل
قبيلها وان كشرت له بنابها=يضحك لها ضحك الاسد بالحيل
ليث مخضرم مارس الجوع والرخا=ملك ولا له فالملوك مثيل
عمران مكه والمدينه شواهده=تفنى الليالي والجليل جليل
بطباعه المصحف كبار وهايبه=يمنى كريم ولا يمين بخيل
ورد لنا الماء صافي من منابعه=عذب مثل نقع الصفا من سيل
كان العلم للعلم هذي معالمه=حراب نوم وللعلوم صميل
انشاء المدارس والفهارس فراسته=فارس زمان ومن خيار رعيل
يالله ياسامع دعا رافع الدعاء=تفرش ترابه زعفران وهيل
يسقيه من نو الثريا همايله=وينبت عليه من الزهور اكليل
ترحم فهد وتعوضه عن جمايله=وترد لاصحاب الجميل جميل
ترك غثا الدنيا وفارق همومها=وخلا من اغلا المترفات حليل
وللعز يا اللي عضتنا في فقيدنا=ياللي لك التاريخ يصنع قيل
انت العزا ياعزانا في عزيزنا=تحيا لنا ياللي لاخوك زميل
زاملت اخوك بسيرته في مسيرته=مسيرة عنها الضعيف يميل
انبايعك ونجدد البيع والولا=بيعة رجال وللعهود كفيل
كفيلنا الله يوم نعطي عهودنا=لك يابطل ياشهم ياحلحيل
والبيع ماهو بيعة البيع والشرا=بيعة ملك ماهو بوزن وكيل
نعم السلف نعم الخلف عن سليفنا=واصل وطبق محكم التنزيل
حنا وراك نواصل السير والسرا=جديك شمال وبالجنوب سهيل
قايد ومن قدته على الخير خيرته=يارد على خيرك موارد نيل
فيك الاخوه والمروه طبيعتك=واصل الطبيعه من طبوع نبيل
سليل مجد مسلسل من سلالته=هذا العظيم من العظام سليل
راي ليا دبر شجاع ليا اعتزا=صارم يبرد للكبود غليل
حزم ليا صمم عزوم ليا نوا=من لاذبه يرقد وراه دخيل
عدل ليا حاكم عطوف ليا عفا=ظله ليا انكف الظلال ظليل
ومبايعه سلطان للعهد واجبه=ولي عهد وللنظام كميل
سلطان خير وضايفات شمايله=مضفي على ستر الديار شليل
عضيد عبدالله ليا هاجت العدا=اصهل ونعرات الحصان صهيل
برعاية الله ثابروا في كيانكم=ياذخر من يخلي سروج الخيل
نعم الموحد ما سها عن رعيته=يهذل على خيل الفلاح هذيل
ياراية التوحيد عيشي ورفرفي=الاصل ثابت والفروع نخيل
هذا وانا للارض والشعب منتمي=ورثي ومن ذاك الفصيل فصيل
فصايل قامت على الدين والشرف=سرجِِِِ لحومات الظلام تزيل
قامت شريعتها وسادت شعوبها=رغم على اهل الكيد والتضليل