الهيـــــــــــــلا *** منتدى قبيلة عتيبة

الله اللي خالقٍ كونه وخلقه يرتجونه = خالقٍ صمّ الجبال وخالقٍ جرد العبالي
يا كريمٍ جاد جودك ما تعدينا حدودك = دايمٍ وجهك وحنا مقتفينا بالزوالي
طاير الاشواق غرّد لو بنات الفكر شرّد = وان صفا عنا غزير المي تاصلْه الحبالي
ما يجي للبال سلوى ..................... = عايشٍ كنّى غريبٍ واقطع الدنيا لحالي
يا........ مستلبّه بين عرق وبين خبّه = في ............ عساكم تاجدون المر حالي
ما تعرفون الامانه كلكم غدر وخيانه = ما عرفناكم لك الله غير في وقت الريالي
اسمعوني وافهموني واعرفوني واذكروني = ما نبي منكم حرام ولا نبي منكم حلالي
كنت في عصرٍ مضالي مثل ابو زيد الهلالي = عايشٍ في وسط ربعي بين عم وبين خالي
يوم هبنّ الهبايب مع مراويح السحايب = عزوة الهيلا عزيزة عاليه في راس عالي
نعتلى غر السبايا عند روجات المنايا = انشدوا خيل السعودي وانشدوا خيل الشمالي
والشريف اللي بمكه لا غزينا له ندكه = خصمنا دايم نهينه وسط ساحات القتالي
وانشدوا جمع المعادي وانشدوا عنا القنادي = وانشدوا بنّ اليماني وانشدوا صفر الدلالي
ما تزعزعنا الحرايب يوم ولد اللاش خايب = نحمد الله من يدينا شاربين من الزلالي
مير والله ما غبنّي غير مخلوقٍ فتنّي = يفتن العالم بحسنٍ ما لقينا له مثالي
آآه واهجري وغلّي من سبايب صاحبٍ لي = ما نسيته وان نسيته جعل ما للعمر تالي
حالفٍ منساه لِـلّـه لو يروح العمر كله = كيف ابنسى غاليٍ غالي ومن يغليه غالي
يوم اناظر في عيونه كن برق الوسم دونه = من جمالٍ حطه الله ويّ والله من جمالي
والجدايل طي طيه كنها ذيل العبيه = أو كما ثعلٍ تنثّر في مقاديم الخيالي
غرني واف الخصايل بالعيون وبالجدايل = اشهد اني يوم شفته ماجنيت إلا النكالي
كنت قبله في طريقي ماشيٍ من دون ضيقي = أعرف السبع المثاني واعرف السبع الطوالي
آآه ويلي من زماني كان ربي ماعطاني = خابر ان العمر يمضي تقرضه طول الليالي
ليتني طقيت بابه قبل ما يقضي شبابه = قبل عصر الشيب والمرقاد في قبرٍ هيالي
والقدر ما فيه حيله لا نزل ما احدٍ يحيله = سنة الله في عبيده جارية والرب والي
أصل خلّي من بديده عن قبيلتنا بعيده = بينهم سمٍّ ذحاح وبينهم سوٍّ يكالي
مير يالله السلاما تجمع اللاما بلاما = انت وهّابٍ العطايا وانت فوق العرش عالي

وسلامتكم