شرب طلع القوافي من عروقي وانسكبت عطور=على ثوب القصيد اللي لبسني قبل لا أسريبه
وأنا لاصار للشاعر حضور وللقصيد حضور=خطفت الغيم من حضن السماء قدام تدريبه.
قصيده وانتي أغلى ما ملكته من شعر وشعور=تقلدتك عزاوي من يصونك لا اعتزيتي به.
فرشت الك الورق سجاد وامشي به فخر وغرور=يشرفك الطريق المستقيم اللي مشيتي به
اهلك آلاد عاصم من سنام ليا حدود السور=وشاعرك أكبر ارقاب الشعرمحفوظ في جيبه
شربتك من عيون ٍ سلسبيل وطعمها كافور=بعد حلقي شكى جرح الجفاف وطالت الغيبه
يحن الليله المنبر بعد غيبة سنه وشهور=مثل ماحن جذع النخله المشهور في طيبه
وانا والله لاهزه لين يرقص لي طرب وسرور=ولبسّه القصيد اللي يشرف من يغنيبه
واسوق من المثايل كل وضحآ خصرها مضمور=مثل منقية المواط والمواط ياطيبه
تفضل ياقصيدي وجّه أنوارك على الجمهور=معي شمس القصيد الشارقه والنور ماليبه
ابا اقدّم لك شيوخ القبيله واخذهم بالدور=واقف لاخوان جوزاء وقفة الضيف لمعازيبه
معازيب الشرف مركى عتيبه محتمين الكور=ذرانا كلنا عن حامي القيض وملاهيبه
شيوخ يوم تعوج الحمايا اعوج من الباكور=يعشقون الصعايب عشقة الحر لمواجيبه
حبوس اضعان ونمورة وغى ومدرجة مظهور=عزايمهم تقض اكبر جبل واتعيد تركيبه
سلايل من ثنو ا بالروح دون البيرق المنشور=وسيف صاغ تاريخ العرب واعاد ترتيبه
ليا مر اسم اخو جوزاء ركد بحر ورسى بابور=وحوّل كل نجم من المهابه عن مراقيبه
انا اخوان جوزاء لي طلب واحد بدون قصور=وانا شاعر ملك ماهو مجنّب عن مطاليبه
ولا اكرم منكم الاّ من دعى موسى بنجب الطور=ومن شيّد بيثرب مسجده حتى نصلي به
يداكم تعطي الوضح البكار وتطلق الميسور=ومدتكم يضيق ابها البحر والبر وشعيبه
عطوني بشت مانع غير مانع لايجي مشكور=بدون قصور في باقي بشوت العز والهيبه
وانا يوم اطلبه مبغاه لا رزه ولا ديكور=ابا ادخل مع كمومه وادعي التاريخ يحكيبه
هذا ماهو حرير اسود تحت خيط القصب منثور=ولاهو بشت عادي يستر الجسم وعذاريبه
هذا في نسجة خيوطه كتاب امجادنا مسطور=وحنا اللي كتبناه ويشرفنا نماريبه
سواده ليل بتنا فيه نحرص لديار ثغور=وشمسه شمس يوم خلينا تصهل وتغزيبه
على اكمامه مناويخ ٍ مضت تاريخها محفور=على صم الصفا ماتقبل الشكات والريبه
وفي اطرافه قلايع خيلنا يوم السنين العور=وفي لمع القصب سيفٍ عطيبات مضاريبه
هذا البشت امتداد امجادنا اللي في امتداد النور=فعول الاد عاصم فيه تقبل به وتقفيبه.
دهات الراي لاحمي الوطيس ومحكمين الشور=يعقدونه وحنا لامشوا بالراي نمشيبه
لنا الفنجال الاول للتقى الطابور بالطابور=ومن يشرب لنا فنجال ماتصفي مشاريبه
عظام المال ترعي في حمانا الوادي الممطور=تحت هيبة لحانا فالمكان اللي تفلي به
وحنا اهل الشحم واهل الكرامه في رخا وعسور=لو إن العمر يصخى من كرمنا كان نصخيبه
قبل نشرع مجالسنا شرعنا للضيوف استور=تفز قلوبنا للضيف قبل إنّا نهليبه
ويسبقنا على الترحيب كيف الدله المحكور=وعود أزرق يسابقنا على الضيف بتراحيبه
وحنا أهل الشعر لاطاب نظم اللؤلؤ المنثور=نظمنا المعجزات السبع من نظمه واساليبه
تشبعنا فخر ماعاد يبقى للتفخار دور=سوى فخر ورى حد المحال إن روح وانجيبه
عظيمة ياقبيلة انجبتنا وانجبت دكتور=طبيب الشعر مستور العصيمي شاعر عتيبه
سماه العالية جنه قصايد والمعاني حور=ومعراجه ذهب يخطيه من يخطيه ويصيببه
نصب بين السماء والارض في العشرين من عاشور=وانا اول من يعديبه وانا اخر من يعديبه
ابا اصعد بالقصيده فوق لين اوصل بها مستور=وقبّل منكبيه ياعسى الايام تبطيبه
رعاك الله ياحرآ بنى فوق السحاب اوكور=وخذله في سماء الشعار تشريقه وتغريبه
سما الشعر امتلك ثلثينها ماشاركته طيور=جناحينه قبيلة مجد وامجاده مخاليبه
لسانه سيف وبيوته حراب ومنهجه دستور=قضاة الشعر فالشعار تحكم به وتفتي به
بنى بالشعر دوله مابناها جعفر المنصور=ورصعها ذهب وش عاد قارون ودواليبه
تصافحك القصايد ساعة التكريم يامستور=مثل ماصافح الشعب الملك في يومه تنصيبه