الف اولف من صميم الفوادي=ابيات من قول الغبيوي جدادي
وأقطف زهور الورد وأهديه كله=للعارفين الحضر واهل البوادي
والبا بنيت اليه قصور كثيره= شيدتها في كل قريه وديره
حسو الزمن لابار شلت الذخيره= والبيت مايبنا بليا عمادي
والتا تعبت وحفيت اقدام رجلي= مشتني الاقدار راكب ورجلي
وكم صلفقت مر المقادير رجلي=والوقت طول ماتحقق مرادي
والثا ثمان سنين جاري وساعي= فريت في كل الفجوج الوساعي
وأكتلت من مرّ الليالي بصاعي= غصب عليّه همت في كل وادي
والجيم جربت البشر كل حيني=جربتهم في العسر ووقوت ليني
وأخترت منهم صاحبن لي عويني= قرم يعاوني بوقت الجهادي
والحا حمول اثقال أنا شلتهنّه= يشيلها الصبّار لو أوجعنّه
لو كان جرحه وسط قلبه يكنّه= غصب عليه ايمس حبل الشدادي
والخا خوي الدرب أنا وين ابلقاه= خل ايصافيني على كل ماأبغاه
واليا لقيته باأدفع المال والجاه= وأصوم لأجله عن شرابي وزادي
والدال دالوب الدهر دوم دوّار= يالله تكفيني صواديف الأقدار
وتزيل عن قلبي همومه والأفكار= والحظ جعله دوم يرقى سنادي
والذال ذاب القلب من كثر مابه= ذابت عروقه كلها من مصابه
منهو يداو القلب مما سطابه= وين الطبيب اللي يجيب المنادي
والرا رمتني في بحرها المقادير= وأسقتني اللوعات من دون تقدير
وأتعبت نفسي وأتعبتنا المشاوير= يالله عسى بالحظ يهب البرادي
والزاي زادت بالخفوق اللهايب= من ساعر في وسط الأضلاع ذايب
وأزريت اطفّ النار مامن هبايب= والنار لوّ كبرت تعود رمادي
والسين سهرانن ولا ذقت نومي= سهرت عيوني كاثرات همومي
ماعاد أعرف الليل من صبح يومي= ولاعاد أميّز بيضها والسوادي
والشين شيال الثقايل علامه= وطا الحزام وصاح ذب العمامه
ياناس قولوله يوطي إحرامه= ماعاد ابه فود يسر العبادي
والصاد صرّاف الدراهم يعده= يحسب دقايقها وأنا أعرف مرده
لوّ راح يم الشمس ليّه مرده= لزّمن عليّه أظهر الحق بادي
والضاد ضيعت الفرح والسروري= أمشي مع البيداء سنود وحدوري
من يوم حظي طاح صرت امعثوري= عيّا يقوم ولا ضوا بالسعادي
والطا طعون الوقت بالصدر بانت= وأزداد بالضامر مداها وشانت
ماعاد تبرا لوّ أنا قلت هانت= والوقت بالأمرار يطعن عمادي
والظا ظلمني قاسي الوقت بالحيل= ويزيدلي بالمر كيل بأثر كيل
لاهوب طاوعني ولا خفف الشيل= يالله بعزم منك للطم الأعادي
والعين عاوني شباب وشطار= يوم الدهر ميّل عليّه والأقدار
شالو معي حملي مصاغير وكبار= حتى الرضيع اللي بلف المهادي
والغين غاذيهم على كل ماطاب= وعلمتهم تعليم من دون كتّاب
وأرشدتهم ليننهم دلّو الباب= وجنيت زرعي قبل حتن الحصادي
والفا فطيم الديد ماقال صاغر= معهم مشا لوّ كان بالسن قاصر
والحر حرن للمقانيص حاضر= ياطيب فعله عقب شفته وكادي
والقاف قامولي على كل ماأريد= وأشتالوا الصعبات معي الصناديد
والشاهد الله فعلهم زاد ويزيد= أحرار شافوني نهار الهدادي
والكاف كف الله عيون الحسودين= اللي على الأجواد دايم حقودين
واعن الدروب الطيبه هم شرودين= هاذي طبايعهم عساهم نفادي
واللام ليت أيام عمري طويلات= وأجزيه بالحسنى على كل مافات
اللي صبر معيّه وشال الصعيبات= يالله يالوالي تحقق مرادي
والميم مال القلب معها ميالي= من فعلها الطيب نهار القتالي
وأنشهد إن البيض مثله قلالي= والسرج مايصلح بليا جوادي
والنون نور العين وأم الفهودي= قامت وعانتني على كل كودي
ترفع لها البيضا بروس النفودي= المهرة السابق نهار الطرادي
والها هبيل اللي عليّه تشره= لأنه غشيم ولا تذوق مضره
ساهي ولاهي منبسط في مسره= مهبول ياواثق بدنياك غادي
والواو ودووه البحر منه يشرب= اللي وثق بالمال عنا تهرب
أنشهد إنه مابعد قيل جرب= لوعات بقعا بالسنين الشدادي
واليا يقول اللي نظمها وغنا= وبالأبجديه رتب القيل بنا
صلوا على المختار أنتم وحنا= رسولنا اللي للبشر خير هادي