يامـل قلـب(ن) ذاق غـدر الصداقـة
كاس الصداقة تالي الوقـت مسمـوم
خانوا بـه الاصحـاب والكـل باقـه
باعوه بارخص قيمة(ن) بأول السـوم
غافـل ويهديهـم مـن الـورد باقـة
وصار الجزا منهم سكاكيـن وسهـوم
إليا حضـر يبـدون حسـن العلاقـة
وان غاب حطوا به عذاريـب وعلـوم
طاعوا كـلام اللـي علومـه ادقاقـة
اللي من الطـولات والطيـب محـروم
الناقـص اللـي مايخـلـي نفـاقـه
نذل ونصيبه مع هل الصـدق معـدوم
سافل حقيـر وكـاس الاحقـاد ذاقـه
بوم ومرده يـا عـرب ماكـر البـوم
الصف يسعـى جاهـد(ن) لإنشقاقـه
(ما يفسد الساحر سنه يفسـده يـوم)
وامثـال هـذا انـا سبـب لإحتراقـه
من فضل ربي معتلـي دايـم الـدوم
ماني وانا ابن عبـس قطـاع ساقـة
ولاني على شـذب العراقيـب ملـزوم
ولالي مع اصحاب الدسايـس إلحاقـة
وعن كل عيب(ن) يذرب الرجل محشوم
ولاني مـن اللـي يغـدرون الرفاقـة
يشهد لي الصاحب وتشهد لـي القـوم
في دمي الخوة لهـا اصـل وعراقـة
(خوة رشيدي) ذا مثل صـار معلـوم
ويا سيفي اللي فـوق متنـي علاقـه
لا وخسارة صرت يا السيـف مثلـوم
طعم الصداقة صـار مـر(ن) مذاقـه
وكاس الصداقة تالي الوقـت مسمـوم

.

مما راق لي