هاض صدري يوم مريت المحازه = وانتحى والنار والغربي يسوقه
وارد اليابان ماظلل قزازه = سائقه مشتاق والمسرا يشوقه
جيب يشبه للسهم واحلا ارتكازه = واذكر الله جعل ربي مايعوقه
يوم صافح نجد وابعد عن حجازه = مثل طير(ن) تو مافكت سبوقه
غير شوف الزين مالي فيه عازه = وشوفتي بيته ومدهاله وسوقه
ليت شوفت من نبي هرجه مجازه = كان راع الحق ماضاعت حقوقه
شب في وسط الحشاء ناره وقازه = لي ثمان سنين والكبد محروقه
قلبي اللي بالهوى طال احتجازه = اجتلد والنوم عيني ماتذوقه
والهوى راعيه مافاد احترازه = لو يغض الطرف مايسلم خفوقه