الهيـــــــــــــلا *** منتدى قبيلة عتيبة - يازماني كل ما سنيت حد الحضرميه

يازماني كل ماسنيت حد الحضرميه

--------------------------------------------------------------------------------

يازماني كل ماسنيت حد الحضرميه
اعترضها عمد مسمارً من الصلب وثلمهــــــــا

ان هرجت قليلين المعرفه زعلوا عليه
وان سكت أهل النوايا السود قالوا ما فهمهــــا

يا معقدة الشوش من ماش سويتوا قضيه
لمها واحد والآخر قرب الحبل وحزمهـــــــــــــا

تصلخون وتطبخون ومنكم الذمه بريه
لا متى والغافلين انيابكم تنهش لحمهـــــــــــــــا

وش خطاي الا هواء شقراً جفولٍ نرجسيه
خازرتني بالعيون اللي تمثناني سهمهــــــــــــــــا

واطلبت ودي طلب بالكلمتين العاطفيه
وطرحت صف الهدب للقاع واغرتني شيمهــــــــا

وانحنت لي طايعه مابين هاذيه وذيه
ورفعت شال الخجل عن وجهها وادت قسمهـــــــا

ماتخون ولا تهون ولا تبدلها بنيه
لو وسمها من مخاليب الليالي ما وسمهــــــــــــــا

قلت سمي ثم تبادلنا التحيه بالتحيه
وحكمت بي كل عرق ورضيت العقل وحكمهـــــا

(( ولا لقيت ابها عيوب الا انها فعلاً وفيه
اغرقتني بالمواصل لين غطاني كرمهــــــــــا ))

كل ما هلت تلقفها الحروف الأبجديه
من غلاها ما بقا حرفٍ عنيد ما خدمهـــــــــــا

وان تجلت للنواظر مثل برج الفيصليه
معجزه في معجزه من راسها لاسفل قدمهــــــا

مايصورها الخيال ولا جنون العبقريه
ابلغ التوصيف عنها صورتٍ محدن رسمهـــــا

لو عرفها قيس ما سمه غرام العامريه
ولو لمحها عنتره شقراه عن عبله شكمهـــــا

ولو يطير بشالها النسناس في سوق الحويه
صار زواره لها جمهور والباعه حشمهـــــــــا

الله اللي خصها بالزين والنفس الرضيه
والله اللي خصني فيها وحسادي حرمهــــــــــا

الحياه بدونها يا عاذلي جرم وخطيه
والسعاده في لقاها اذوقها واطعم طعمهــــــــا

قربها يطرد دجا سود الليالي الخرمسيه
والدفا في صدرها واليا ضميت العد فمهـــــــــا

طاهرً يطفي ضمايه منه صبة شاذليه
رشفةٍ تنسيني ايام العوز ويطيب ألمهــــــــــــــا

ذكرتني في حديث الجد عن رحلة طميه
يوم شدت وانزلت في جال ضلعٍ ماعزمهــــــــــا

يالعواذل مالكم عندي كثير ولا شويه
ريحوني دوب حانت فرصتي وابا اغتنمهــــــــــــا

ان زعلتوا ماعليه وان رضيتوا ما عليه
وش يصير اليا تغامزتوا وقلتوا ما فهمهــــــــــا

الشـــــــــــــاعـــــــــر / ضــــــاوي العصيمـــــــــي

ابوطلا ل