الهيـــــــــــــلا *** منتدى قبيلة عتيبة - قصيدتي في حفل تكريم الشاعر عمر الخالدي

السلام عليكم ورحمة الله وبركاته

اسعد الله مساكم وصباحكم بكل خير

قصيده اللقيتها في حفل تكريم الشاعر عمر الخالدي

1-ياهجسي قم نجب القاف تنجيب=تنجيب شيخن ساس الامجاد ساسه
2-عاش البداوه واخذ منها تجاريب=وصارت تجاريبه تدرس دراسه
3-حزة دعاني الخالدي جيته مجيب=في ليلتن فيها الفرح والوناسه
4-سلام تسليمن يصفي المشاريب=وافي وملبــوس المعزه لــباســه
5-ســـلام ياقــومن توفي المطــاليب=اهل الكرم والعلم واهل الفراسه
6-قومن لهم في صفحة المجد ترتيب=يوم اشهب البارود يدوش عماسه
7-عزوة بني خالد سيوفن معاطيب=والفخر والنوماس يغرس غراسه
8-في حفل شاعرهم.عميد المواجيب=شاعر وفالميقاف مرفوع راسه
9-خيال حثلوم الشعر رمحه يصيب=جزل المعاني فيه طبع الرياسه
10-تاريخه مشرف ولابه عذاريب=ابداعن وفنن بعيدن مراسه
11-بالشعر عدى في علو المراقيب=وفرحبه الجمهور واهله وناسه
12-يوم الردي في رميه يصيب ويخيب=حطاب ينقل من على المتن فاسه
13-ومن اول المرقاب في رقيه صعيب=ولا كل رجالن وصله وداسه
14-واليوم يرقون المراقيب بالجيب=في وقتنا وقت الحيل والسياسه
15-وحتى ولو هاموا بوسط الاشاعيب=فوق الثرى والنجم صعبن مساسه
16-والخالدي خلد على صفحة الويب=ووجه الفخر يفداه وجه التعاسه
17-في حبك ولا سبك فن وتعاجيب=انا اشهد ان الشعر سادس حواسه
18-وانا وقفت الليله بماقف الذيب=اعسف بيوت الشعر عسف بسلاسه
19وبغيت اقدم بشت لمقدم الطيب=والمشكله ماني بعارف مقاسه
20-وبدلتها بالسيف عطب المضاريب= الي يقص العظم وقت الحماسه
21-هذا وانا ربعي لهم فعلن مهيب=عدوهم مايهتني في نعاسه
22-عتيبه الهيلا بلا شكن وريب=مثل الجبل راسي وياقو باسه
23-وتاريخهم معروف ياهل المكاتيب=كرامه ورحمه ومجد وشراسه
24-وضرب الثميدي عند حرش العراقيب=خصيمهم منصاب والشر حاسه
25-وصلاة ربي عالم الجهر والغيب=على النبي اصل الشرف والقداسه