اشوف ماجد جالس ٍ تالي الليل= مدري يحسب النجم ولا علامه
البارحه جالس يجر المواويل=واليوم يالله ياعساها سلامه

يالداهيه حلل وأنا أعطيك تحليل = لا تلبس عقالك بدون العمامه
إن كان بانت لك علوم ومراسيل= كل ٍ فوقت الجد يكرب حزامه

قالوا لنا العربان لاتامن السيل=السيل ياخذ مالقى من جهامه
وانته حذاري غير توك دهاويل=وكلٍ على ماقيل وقت العسامه

السيل شالك وأنته تحط وتشيل = والميت اللي مات بعثر عظامه
عطني علومك يا قليل المحاصيل = لن كنت تدري بالكرم والشهامه

السيل جاله يالعتيبي تحاويل=والصبح لاأصبح جاك ليل بظلامه
ماهي علوم ٍ لك ولاهي بقاويل=وشعيل ممسوك ومقيد خطامه

الداهيه هذا علومه تهاويل= والليل لو يظلم عرفنا نظامه
أقلط على فنجال من بن ٍ وهيل = وأشعيل لا تقربه يفجع سنامه

ياماجد الهذلي ترا نجمك سهيل=لن طاح يسهل على الارض التهامه
تعال يالهذلي وسوق الفناجيل=من دلة ٍ يحرم عليها الهلامه

يالداهيه حذرى تجيب الأقاويل = وأنته تلوم ولا تجيني ملامه
الضيف له واجب وله حق تكميل = ومنته غشيم ولا تجيك الغشامه

الداهيه يعرف يكيل المكاييل=والسالفه ماهي حراب وزعامه
ياشيخ ياللي ظالم ٍ بالمعادييل=كب التعجرف لاتجيلك سهامه