الهيـــــــــــــلا *** منتدى قبيلة عتيبة - سر يا قلم واكتب على الكيف طاروق

سبحان من جوده على كل مخلوق = وسبحان من بيديه تقسيم الارزاق
ما له شريك بعزته منزله فوق = مجري نصيب الحوت في وسط الاعماق
سر ياقلم واكتب على الكيف طاروق = اجرّ به صوتي بعد خاطري ضاق
وعزاه يا قلبٍ من الهم محروق = صبره على ما جاه ما عاد ينطاق
حلو المنام بسبّته حارب الموق = تقبل هجوسي ليا اقبل الليل سباق
قامت توارد كنها وارد النوق = ترزم على عدٍ روي ماه دفّاق
هذا وياراكب على كامل الذوق = لكزس جديد وراكبه قرم سوّاق
احمل كتاب ٍوصلّه شخص مرموق = منصاك ابو متعب له القلب مشتاق
تلقى الكرم والطيب والنجر مدقوق = في مجلسٍ ما صك باقفال واحلاق
قول لفهد عودك ترى ما شكا عوق = بينه وبين الوقت لو جار ميثاق
يصبر على وقت الغرابيل والبوق = حتى القريب اصبح للاقراب بوّاق
ماهزني فالوقت جاهل ومطفوق = رجلي على درب المناعير تنساق
ومن التجارب ناخذ الطاق مطبوق = وعشنا وشفنا حلو الايام وامحاق
كم جاهلٍ ما يدري الوقت ممحوق = لو زان اله دوراة لابد ينعاق
ياما وياما فرق الوقت معشوق = بعّد وليفه بدّل القرب بفراق
هاذي هي الدنيا تجاريب واطروق = لوكان تبرق عفتها زيف براقّ
بين القرايب ضاعت الزام وحقوق = ينعاف وقت ٍزامر ٍفيه هطـّاق
ما عاد الي يابوك فالسوق ماسوق = ابي اتعلـّى فوق بالحوم خفاق
طويت حبلي مابقي غير معلوق = بيني وبين مدّبر الكون خلّاق
يغفر ذنوبي لانتهي كل منطوق = اليا ادبرت والتفت ا لساق بالساق
وختامها صلوا على خير مخلوق = شفيعنا في موقفٍ ييبس ارياق