حاولت أنام وطيّر النوم كابوس=والقلب من هجمات الأفكار حساس
طب القلوب اللي بها الهم محسوس=مشياً مع البيدا ليا هب نسناس
فجٍ خلا ماهو من الناس مانوس=فيه السراب لصورة الأرض عكاس
يسوى من الدنيا عمارات وفلوس=وأخير من قربة غثيثاً من الناس
قفر الأماني رد من دونه عسوس=لقى العطش واستصعب الأمر عساس
كان اللبيب ملجلجاً تقل مضروس=كيف الهبيل اللي بالأوهام غطاس
تاهت خطاوينا وهب الهوا كوس=وضاعت هقاوينا وردت بالأتعاس
شفنا من الأيام ميلات وعكوس=نصبر وننطح داعي الضيم بالباس
ناخذ من أخبار البشر عبر ودروس=ونشفق على علماً لنا فيه نوماس
كلاً على ما كان بالنفس مغروس=وكلاً على ميراث والعرق دساس
بين النشاما بيرق اللاش منكوس=وبنكه من التقصير يعلن بالإفلاس
على جباه اهل الردى رسم هندوس=مثلث الحقران والبخل والياس
الموت جوع بعز تحيا به نفوس=ولا شبعت الذلاّن ببيوت الأنجاس
لولا الغرور وشور بايس ومنحوس=من زخرف الهقوات بعيون جساس
للدير والرهبان لمات وطقوس=وأشباههم حول الكنيسة والأجراس
يا هاجسي غرّد ترا ما انت محبوس=حرّر خيالك ما على الفكر حراس
وارسم مساراتك من القوس للقوس=وازرع ورودك بالأمل بين الأقواس
لا للنفاق ولا لتطمينة الروس=موت الشجر واقف وهو شامخ الراس

المشاركة الأصلية كتبت بواسطة سعيد مرزوق العبد (المشاركة 1310570) ياسلام سلم صح السانك يالشمري هذ القصيد اللي ينومس معني وحبك وسبك وقافيه متناسقه صراحه جازت لي حتي النخاع ماتبيعها لي يالشمري

المشاركة الأصلية كتبت بواسطة طراد العصيمي (المشاركة 1310767) فــجٍ خــلا مـاهـو مــن الـنـاس مـانـوس فـيـه الـسـراب لـصـورة الأرض عـكـاس يـسـوى مــن الدنـيـا عـمــارات وفـلــوس وأخـيـر مــن قـربـة غثيـثـاً مــن الـنــاس الله الله الله الله صح السانك مليون يالسنعوسي قصيده شامخة كشموخ شمر القبيلة سجل اعجابي ياولد الطنايا

المشاركة الأصلية كتبت بواسطة مخلد منصورالثبيتي (المشاركة 1310793) عبدالله صح السانك وحياك الله في منتداك قصيده تشمل كثير من المعاني الجزله سجل اعجابي بما دونت وتقديري لشخصك الكريم

صح لسااااانك.....
قصيده جزله من شاعر جزل ويستاهل الاشاده
نسل السناعيس كفو وبيض الله وجهك

تحياتي ,,,
خالد الغربي