عبدالحميد الفهمي
يا مرحبا يا هلا ترحيب وافي يشرح البال = ينعد بإسمي وبإسم الشيخ ناصر والقبيله
يا فالح انا ادري ان الشمس ما تحجب بغربال = حقيقة ما تغير بين يوم وبين ليله


فالح الغنامي
دام البقا يالرجال اهل الوفا رجال رجال = إنيابة عن جميع اهل المكارم والفضيله
اليا بدا دون وجه الشمس عج وبرق واخيال = يمكن تشوف المخيله بعدها ينشي مخيله


عبدالحميد الفهمي
مادام حليت في حلة فهم علم ويش الحال = اليا عرفنا الموكل مابلشنا مع وكيله
اثر الجليله لها عند البدو تقدير واجلال = الجاهليين لازالوا يجلون الجليله


فالح الغنامي
انا عيوني مطاولها سهرها أيام واليال = لكن ما أسهرتها مع قصة العين الكحيله
مادامك أمقيم ماشددك من ديرتك رحال = وان كان صعبت عليك انحلها بأهون وسيله


عبدالحميد الفهمي
لا باس ياصاحبي ما يسهر الا حارس المال = والا هل الدين والا راعي الكبد العليله
اللي جهتنا يزرفلها نرده بأم زرفال = واللي جهتنا انتهت واللي جهتكم مستحيله


فالح الغنامي
الظاهر أنك حصرت الناس بين أصناف وأشكال = لكن ياكبر حضك يوم ترقد كل ليله
تقصر طوال اليماني عن يمينك كل ماطال = وان كان قصرتها سلم على اليمنى الطويله


عبدالحميد الفهمي
يا اهل القوانين للقانون سلبيات وأفضال = أنا مقدم دليلي مير فالح ويش دليله
حنا نقول احذروا لاتفسد النيات الأعمال = كلمه خفيفه ويبدو لي نتائجها ثقيله


فالح الغنامي
أنا أقدر أصنع لك أفكار جديده وأصنع أمثال = وإلا أنت ما تقبل الا المعتبر حطه وشيله
نظام حافز عطى روس العرب مصروف عمال = وأهل المشاريه ماترضيهم الأشياء القليله


عبدالحميد الفهمي
ياللي صنعتم رصيف الشمس حطوا للبحر جال = يوم الديار البعيده ما يصلها الا الاصيله
يا وقت ياوقتنا كم فيك من طيب وبطال = الظاهر أبو نقا يابا يجيله سقم جيله


فالح الغنامي
لولا التغير ماشفت الناس من حال ليا حال = اليوم حرب المدافع بعد حرب أم الفتيله
اللي يغرس النخيل وينتظر لأثمار وإظلال = أموت ما أخاشر العصفور في ثمرة نخيله


عبدالحميد الفهمي
اللي يضيقون من لبس العقل ماهم بعقال = كان أنكم من هذا التيار مافيكم عقيله
تقولها وانت ماحصلت منها ربع مثقال = ادخل على الله من تدمير الأفكار الدخيله


فالح الغنامي
أبو الحصيني بغى غصن العنب يوم العنب مال = لكن عظامه قصيره والقصر ما معه حيله


مودتي لكم جميعاً