إستمع شعر المواعظ لعلك تستفيد = جعل توحيها المسامع وقلبك يطبعه
هاض مكنون القصايد من النظم الجديد = اجتهد واصون شعري واعزه وارفعه
اتحاشى كلمةٍ تجرح العاقل وحيد = عن كلام الزور كله وشعر القرقعه
مثل بعض اللي يجي للجرايد فالبريد = نسمعه يقراء ولكن عجزنا نبلعه
شي من نوع الخرافه يسمونه نشيد = لو يجيله ريح من شم ريحه يصرعه
ناس ماتعرف بيوت القصيد من العصيد = مثل ماقالوا هل العرف فالناس إمعه
ان تركته ضاع مايفهم الثور البليد = وان نصحته شك والنصح عيا ينفعه
وان حضر مع نخبة تصخر القاف العنيد = جاب قصديره معه لذهب ثم لمعه
مثل ذا لو تمتلي جعبته قيح وصديد = ياتي اشلى من خراميط هرج يجمعه
الرجال يميزون النحاس من الحديد = والذهب الاحمر يجي بينٍ من مقطعه
لا بغيت القاف لو باد راسك مايبيد = لا يخالف تالي البيت معنى مطلعه
ولا تجيبه ناقصٍ ماله إلا رجل ويد = لاتعرضه لين ياقف معك على اربعه
إضبطه لاينقص الهرج فيه ولا يزيد = شيكه من قبل لا تظهره من مصنعه
شاعرٍ مايضبط القاف ما اسمع له قصيد = وشاعرٍ مايخدم الدين ما احب اسمعه