ياذا الحمام اللي تغني على الراك=قلي وش اللي شفت يالورق واعجبك
تلعب طرب يالورق و تزود بغناك=مبسوط و الغربي نسيمه يلاعبك
لو شفت شيٍّ شفت يالورق عناك=والله لتبطي وأنت يالورق في رَّبْك
تحمّد الله يوم جنبت منّاك=ما مربك دربك على شي يتعبك
ياشين شوف المايله من هذولاك=و المشكلة لا شفتها من قرايبك
أحيان عدوانك تجي من دناياك=و تراك لو تسكت تجي من سبايبك
و ترى عدوك لا تراخيت ياطاك =وأن شاف منك الصاملة غصب جنبك
و ترى صديقك من يعلمك بخطاك =ماهوب يحجبها على شان يكسبك
رفيقك اللي بالمهمات وياك=اللي بوقت الضيق ياقف بجانبك
ادمح خطاه ولا تحسه بعجفاك=تراه لعيونك مثل وصف حاجبك
ولا ترخي الهامه على شان دعواك=أرفع مقامك لا تقلل بواجبك
والرزق عند اللي من الطين سواك=لا تحسب أن الناس تقضي نوايبك
وأصبر على ماجاك والرب ياقاك=ولا تبدي أسرارك على اللاش ينكبك
واعرف ترى الهيّن على الهون يحداك=والهون هون ولا يطول بشاربك
عليك بالكايد ترى الكايد ادواك=مثل الرشاء من قاعة البير يجذبك
وتراك لوعندك مشاريع وأملاك=ماصاب جدانك بعد حين صايبك
حتماً عليك تزول وتكب دنياك=وعسى عملك ليا لقيته يناسبك
والحفره اللي هي مصيرك و مثواك=اِعمل لها قدام تركز نصايبك
أدّ الحقوق اللي شرعها لك مولاك=و حاسب ضميرك قبل ربك يحاسبك

وأصبر على ماجاك والرب ياقاك=ولا تبدي أسرارك على اللاش ينكبك
واعرف ترى الهيّن على الهون يحداك=والهون هون ولا يطول بشاربك
عليك بالكايد ترى الكايد ادواك=مثل الرشاء من قاعة البير يجذبك

وتراك لوعندك مشاريع وأملاك=ماصاب جدانك بعد حين صايبك
حتماً عليك تزول وتكب دنياك=وعسى عملك ليا لقيته يناسبك
والحفره اللي هي مصيرك و مثواك=اِعمل لها قدام تركز نصايبك
أدّ الحقوق اللي شرعها لك مولاك=و حاسب ضميرك قبل ربك يحاسبك