بسم الله الرحمن الرحيم


نافخ الكير

عـطـر النداء مـايقــبلـه(نـافخ الكير) = لوكـــان تقــطـف مــن وروده وتــعـطـــيه
والطـــبع لـوغيـــرت مــليون تغــيير =صعب(ن)عــلى الانسـان يخـــلف مــباديــه
عــقــلــه يصــور قدمه الناس تصوير=ان الاوادم كــلبــوهــا تــحـــــاليــــه
والشــك ســـم يـدمّر الرجـل تـدمــير = مــاعـــاد يعــرف صـــاحبــه مـن مـعاديــه
تجــبرني الخـــوه وتــــدعيــني مطير=عـــلى الــوفـــا هـرج(ن)نقــوله ونحـــميه
مــاهيـــب خـــوة تدهن السير ويســير =خـوة رجــال(ن)صادق الـــوعـد توفيـه
الـــنا مـــع اهــل الصدق غـاره وتوقير=حــنـا قـضاة الصدق لاغــــاب قــاضـيـه
واذا الــخوي مـــالــــه مـــعزه وتقدير= احسب حساب لخوتي يوم اماشيه
رفقتـك صارت مثل عج المعاصير =الــلي ريــاحــــه عــكــرتــهـــا ســـوافيـــه
مــاهيــب بـــسلــوم الرجال المناعير=الـــلي لهـــم بــالطــيب حــكمه وتــــوجيه
هـــذا جــزا من يبـــدي الــراي ويشير= لوكـــان مـــايملــــك ســـوى راحــة أيـديـه
الـفـرق واضــح مثــل ابـانـات والنـير =كــلــن عــلى نــيــات قـــلبــه هـــقــاويــه
بيــن الــخــوي اللي عــلى الـــخــوه يـغـير =الـلي خــويـــه قــــبل نــــفــســه يـــبــديــه
وبيـن الــخوي الــلي ســنونه مكاشير =الشـــك عـــنوانــه ومـصـدر دعــاويـــه
مـن دوور الحـــنا بســوق الصقاقـير=مـــاني رفيــقه جـــعــــل بــقـــعـــا تحنيه
الــلي يــريـــد البـــعد لــلبـــعد تسـخير= ومـن حـب لــه غـالي عـرف قـدر مغـليه
والـلي يــريد القرب يقــصر مشـــاوير = ويصبر على الحاير وريحة مجاريه
ماشــيت مـن بــعدك وفــود وطوابير = ولاعـــاد بـــه شي(ن)على الارض غــاويـه
وان كان لـــك عــود(ن) تمسيه بــالخير =مـــره وانــــا مـــثلــــك بمره وامســيه
وان كــــان قــــدم لك دلالن مــواجير= احـــــذر تقــــهوا دلـــــته قبـــل شاهـــيه
خلك معه واليا انكسر ضلــه عصــير=اخـــذ الدلال وصـــب لـــه ليـن تــرويـه
وان نـاطحوك اربع رجال(ن)مداوير= في مــربع(ن)تشــفيــك روضة فــيافـيه
واحــد تراه عبيد اخــو سالم الزير=والـلي عــلى يـــمينه محـــيسن بنــاخــيه
واللي وراه يــسار ابن عـــمه عمــير= والــرابع تــــعرفــــه قــبــل لانسـمـيــه
لنـّــه ولــد عــبّاد ريــف الــمساييـر= نــفرح بشـوفه حــي وان مــات نــبكيــه
ان جــاك قــافي لايخـــدرك تــــخدير= احســب حســابـــك لا تضيع بمـــعانيه
فـرفش وعــبر عن مشاعرك تعبير= مغـويك شك(ن)حدب الاضلاع حاويه
لاتــعتــــــذر مــــني فــــدتك المعاذير=الشـــك لامــــنه طـرق بــاب يــنهــيـــه
وان كشــرت دنـــياك بــالوجه تكشير=اعــنــز على اللي مـيت الــــخلق يحيــيه
لاتـنتــظر فــزعة طـــوال الاشــابــير=واذا بغيــت أيـت خـوي منــت لاقـــــيــه
يشــهرعـلى مــتن الهــوى كنه الطير=حــّدر وسنـــّـد مـــالقــى مــــن يـــناحـيه
الــلــه يـــقــديـــنا عـــلى نـــية الخير=وكلـــن عـــلى نيـــات قـــلبــه يــجـازيه

بقلم الشاعر:عبدالرحمن العقيلي