يا الله ياللي باب رحمتك مفتوح= ديم على طول المدا والليالي
يالواحد المعبود يا خالق الروح =علمك بحالي كافي عن سؤالى
ارحم يتيم بين الابواب مطروح= نفسه تردد فيه والجسم بالي
سر يا يا قلم واكتب جوابي على اللوح= وسطر بيوتن مثل نظم الريالي
مدادها من عبرة جالها فوح =من وهجن بالقلب ضيق بحالي
وبلغ سلامي حرب سالم ومسروح= من الخليج الى اليمن والشمالي
واهل القصيم ونجد والواد ابو دوح =والساحل الغربي وذيك التلالي
عيني تهل الدمع والقلب مجروح= مير افزعوالي كلكم ياخوالي
الورع في سجن الحفر وامه تنوح= حفيدكم يمكر! مين العيالي
اتلا العهد به يوم شالوه مسدوح= وموثقن في محكمات الحبالي
والحكم صادر والقضاء يزق الروح= وحان ا لوعد ما با قي الا ليالي
والله لوانه يوم الاحداث مذبوح= لنساه واصبر عنه مع ماجرالي
واونتي يا خال من داخل الروح= ونت صويبن طاح والجو خالي
خلي العكفان الدناقير مطروح= في موقعن تسفى عليه الرمالي
والعذر ماينفع ولاينفع النوح= ان كان خالي ضاع فيه المجالي
والخاتمه يااولاد سالم ومسروح= ذبحة بناخيكم عليكم وبالي
واصل القضيه لعب ورعان ومزوح= وما قدر الله ما عليه احتيالي
ومصائب الدنيا تجي يوم وتروح= ولواعاتها تدور دور المحالي
والعفو ما بين الاجاويد ممدوح= ليا عفو عن الحمول الثقالي
والصبر باب لاهل الخير مفتوح= والله يحب المحسنين الرجالي
من يفعل المعروف والبال مشروح= جزاه عند الله عزيز الجلالي
هذا وصلوا عد براق يلوح= على النبي اعداد وبل الخيالي