عذب السجايا دموع العين يرثنه = باللحد الأظلم عليه القاع مردومه
من غير ماصف وصوف الحور يشدنه = اللي فراقه جعل دنياي مكتومه
لوذاق حزني ملاك الموت ماضنه = شاله وخلاّ لي الوغدان وهدومه
يامرها لاسمعت من الوغد ونّه = ياشينها فاجعات الوقت وسلومه
قالوا يبه قم ودّنا الجنّه = نبي نشوف امّنا وننام بكمومه
يبون مثل خوياهم والجدى ونّه = آمنت في دبرة الخالق ومقسونه
ياطول حزني عليها ماقدر اكنّه = ماينفعن ليت لي يوم قبل يومه
إثنا عشر عام عجزن لاينسّنه = موته لقلبي زمهريره وزقومه
هي جنّة ذقتها غيري سمع عنّه = مايرومه الوصف مهما جاد مايرومه
ياوسع عذر الدموع اليا تباكنّه = مالي جدى إلا الونين وقول مرحومه
حنّيت حنّة خلوج شالته دنّه = وحوارها شوف عينه قسمت لحومه
ونيت لي ونّة ماونّته شنّه = بيد العقيدي من المسحوب مهمومه
وارسلت له صيحة ماعاودت منّه = ولازلت اراجي بشير الخير بعلومه
عساه بالخلد والأنهار يسقنّه = في روضة من رياض الخير محشومه
وصلاة ربي عدد طش يهلّنه = غر السحايب على محمد وتسلومه

المشاركة الأصلية كتبت بواسطة عايض جزاء العصيمي (المشاركة 1274673) لاهنت يامحمد قصيده معبره ومؤثره في نفس الوقت دائما ذائقتك عاليه لاهنت وصح لسان شاعرها