الهيـــــــــــــلا *** منتدى قبيلة عتيبة

قالوا تدلل

قالوا تدلل قلت بأي التعابير ### قالوا تمنى قلت بنت ابدويه
ياليت لي يا ناس جنحان وأطير ### وأشوفها يا ناس صبح وعشيـّه
هي منظري هي منطقي وفالحشا غير ### هي حبي اللي يا عـرب ذاب فـيـّه
ياونتي في بعدها حيل أنا اصغير ### ما عاد لي قيمه ولا لي حميـة
يا ناشدي عنها تراها على خير ### هي طايـفي هي بلدتي اليعربيـه
بنت الحجاز معطّره بالتعاطير ### تغازل النجدي وجاها سـعـيّه
وكثروا خطاطيب الحجاز المسافير ### من نجد ربعي وفي عسيله حميّـه
الصيف يشهد في قدوم المزاوير ### كل الشمال ونجـد وسـط الحويـّه
يا ديرتي وإن غيبتني المقادير ### والله ما أنسى فضلك اللي عليّـه
جيرانّا كانوا شروق(ن) مناعير ### والـيوم ذا لحجي وذا دنفـسيّـه
ناس(ن) أجاويد(ن) كرام(ن) تباشير ### راحـوا وخـلـونا عـليهـم بكـيّـه
آلاد مـانع والغـشـيان واخضير### وبيت الفهد سطام صاحب أبـيـّه
وبيت السريّع والسميري بهم خير ### والشيخ زامـل والضويحي يابـيـّه
وألاّ الخليوي والعبيكان يا طير ### وألاّ الحـروب أخـلاقهم عنبريّـه
وبيت الخراشي والحميدين يا مرير ### وبن جـوهر اللي جيرته جت هديّـه
وعيال ابن داود حزات العصير ### الكـل يـعـزم والمجالس سـويّـه
والباز والجماز والزيد لا ضير ### إن خان ذكري للوجيه النقـيّـه
محد(ن) حجب خيره عن الجار والغير ### مـشـرّعـين الـبـاب والنار حـيّـه
وآ وجد حالي وجد ذيك العصافير ### اللي غدت يا بـوي مرمى الرميّـه
وجدّي يتوجّـد لا طرى نجد يا عمير ### يـسـتـذكر الجيران وصحـبه قويّـه
من حقي أفخر في مخاواتهم مير ### طشتني الدنيا على أرض(ن) عميّـه
لاني مسكت أرضي ولا بد ما يصير ### ولا لي على نجـد العـزيـزه مطيّـه
ما عشت فيها غير عام(ن) وهو غير ### لكنّ حـبـه منغـرس حـيـل فـيّـه
في نجد يم الوشم ربعي كما الطير ### وأعـدادهم يا ناس ماهي شـويّـه
حنّا عتيبه وارجعوا للتفاسير ### الأرض للواهب عظيم العطيـه
ربي عطانا وانتظمنا طوابير ### وحكامنا آل سعـود لاواهنيّـه

وسلامتكم
أبو زيد