ما دار بين حمود الرشيد وراكان بن حثلين والعفار
 

الأخوة أعضاء المنتدى السلام عليكم ورحمة الله وبركاته

اقدم لكم اول مشاركة لعلها تعجبكم

بعد وقعة عروى المشهورة قال حمود الرشيد هذه القصيدة

حمود الرشيد


يا ليل سلم لي ليا جيت راكان *** سلم على زيزوم يام وأميره
اليوم صاروا بالعرب تقل جيران *** ومن أين ماوجه تقفوا نشيره
واذكر لهم بالكون طيحة غزالان *** ثلاث مرات بوجه المغيره
يوم حضرنا فيه ليل وفوران *** يوم على عروا تقطع غثيره
إن كان ابن هندي نوانا ببرزان *** حنا على عروا قصرنا مسيره
جينا على وضح النقا عقب الأذان *** ذبحت قواد الجمل بالمريره
جينا على ذروات عجلات الأقران *** مستجنبين كل قبا ظهيره
حصان الصميد اللي يسمى صنيتان *** صيت بلا جري ووصوفه شهيره
إن جاك بالعرضه اليا تقل ديقان *** يفزع بسيفه سلة من جفيره
من كان باللقوات روغات الأذهان *** ما ينقهر غاد الجدا من منيره
والسابق اللي عندكم يا أبو سلطان *** لها بوجهك شامة مستديره


فرد عليه عليه راكان بن حثلين بهذه القصيدة ومدح فيهه قبيلة عتيبة



يا راكب من عندنا فوق شقران *** خرزها بالخرج فوق النجيره
وصل سلامي لأخو نوره ببرزان *** وعـقب السلام تخبره بالسريره
من باب عمان اليا باب نجران *** ما هو أنا يا الضغيمي أنت أميره
علم لفانا فيه ليل وفوران *** استر قلبي يوم جانا بشيره
جا من حمود شوق مياح الأردان *** هو شوق من تزها الشقايق نظيره
عضيد أخوه بصادق الفعل ولسان *** ودبولر راس اللي دوابه مسيره
فرز الوغا لا جا ثقيلات الأكوان *** لا سل مصقول السني من جفيره
خبرتني يا حمود عن طير حوران **** يوم على عروا تكسر عويره
خلت مخاييله بدرج وسبهان *** ما ينتميز وردها من صديره
تذكر محمد جامع نجع عتبان *** ذخيره ياوي والله ذخيره
الأمر قدره الولي عالي الشأن *** وإلا عتيبة ما عليهم قصيره
كرمان وإن ركبوا على الخيل فرسان *** اليا اختلط عج الرمك بالمغيره
سبيتنا سب على غير برهان *** ما تستوي هذا لزبن العشيره
وحن بديرتنا ولا حنا بجيران *** في شايه اللي ما يوازي جويره
حامين ديرتنا بخيل وفرسان*** يوم إن كل له حدود وديره
من زان حنا له على الزين خلان *** وضر اليا حرك تزايد سعيره
ما قل دل وزبدة الهرج نيشان *** والهرج يكفي صامله عن كثيره


اما قصيدة ضيف الله العفار فلم اجدها فعلى من يعرفها ان يضعها هنا

وله جزيل الشكر

ارجو ان لا تكون المشاركة مكررة لكوني لم اتصفح المنتدى كاملا

والسلام عليكم ,,,,,,,,,,,,,

يا هلا فيك اخوي الذيب ومشكور على الابيات اللي ذكرتها

اما رد ضيف الله العفار على حمود الرشيد فكان من خلال الابيات التاليه



ياحمود كانك قاعد وســــــط برزان0000 لابان لك فعل ولالك مشــــــــيره
اليا بغيت الشيخ يوقفـــــــــك سبهان 0000 تاقف لما ان العلم يرجع لاميره
ولولا حسن نوخ بذربـــــين الايمان 0000 راحت عليكم يابو ماجد كســيره
اولاد علي مطوعة كل فســــــقان 0000 عاداتهم بالكــــون كف المـغيره
وابن سعود اللي يسمى غـــــزلان 0000 درع بتــــال الخيل مثل السـعيره
والسابق اللي قلت عند ابن سلطان 0000 مع تسعة اللاف علينا مــــغيره
حنا خذينا الخيل قلع بالارســـــــــان 0000 اصايل في نجـــــد حتى الجـزيره
ياحمود لا نسرق ولا حن ببـــوقان0000 البوق في حكمك عسى الله يديره
الذم مايهفي للاجــواد مـــــــــــيزان 0000 والمدح مايرفع يدينن قصـيره

يقول حمود الرشيد في احد ابيات القصيده التي ذكرها اخي العزيز الذيب

والسابق اللي عندكم يا أبو سلطان *** لها بوجهك شامة مستديره
وهو يقصد ان احد الخيول اللي عند محمد بن هندي مسروقه وهي في الحقيقه ماخوذه قلاعه في كون سابق (( معركه سابقه ))

حيث رد العفار على هذا البيت بقوله

والسابق اللي قلت عند ابن سلطان 0000 مع تسعة اللاف علينا مــــغيره
حنا خذينا الخيل قلع بالارســـــــــان 0000 اصايل في نجـــــد حتى الجـزيره
ياحمود لا نسرق ولا حن ببـــوقان0000 البوق في حكمك عسى الله يديره


بعد هذه المعركه حدثت موقعة الرحى او كون الرحى وانتصرت فيها عتيبه على
ابن رشيد ومن معه من اهل القصيم وبعض القبائل الذين كانوا تحت حكم ابن رشيد

هذا وتقبل تحياتي

اخوك الراوي

تذكر محمد جامع نجع عتبان
................... ذخيره ياوي والله ذخيره

الأمر قدره الولي عالي الشأن
.................وإلا عتيبة ما عليهم قصيره

كرمان وإن ركبوا على الخيل فرسان
..................اليا اختلط عج الرمك بالمغيره

اخي الذيب , تقول ان هذي اول مشاركة لك , اقول هذي عن الف مشاركة , وعزالله انك اسعدتنا بهذة القصائد , التي تعبر عن ماضي اهلنا , وما يحصل لهم , وبيض الله وجهك وكثر الله من امثالك , واتمنى منك يااخي الذيب ان تتحفنا بقصائد وقصص قبيلة عتيبة , انحن بإنتظار ذالك منك.



اخي الراوي , كفييت ووفيت , ومشكور على ردك على طلب الاخ الذيب بالقصيدة المتبقية , واشكرك كثير الشكر على ذالك , واتمنى منك المزيد يااخ الراوي , وبيض الله وجهك , وكثر الله من امثالك.





وتحياتي لكم من الاعماق:
ابن مشيب.............الشيباني العتيبي.



;)

الحقيقة انا عاجز عن شكرك يا أخي الراوي على تكملة الموضوع بقصيدة

العفار ولكن ما أقول الا الله يبارك فيك ويوفقك في الدنيا والأخرة .


تسلم اخوي ابن مشيب على هذه الكلمات وما اتيت به قليل من كثير ولن أتوانى

في وضع اي مشاركة مفيدة في هذا المنتدى الرائع وان شاء الله اكون حسن

ظن الأعضاء بي


وتقبلوا تحياتي