أستغفر الله هاتها والتوبة = ما عاد أبيك تعيدها من ثاني
وإن عدتها حلـّـت عليك عقوبة =و الله ما تسلم سياط لساني
أموت رقة و أنجرح بعذوبة = يا هوه خاف الله ولا تبلاني
شوفتك ماهي غايتي المطلوبة =دامت خيالك مستحل أعياني
الغاية اللي في الحشا محجوبة = بيـّـحتها للناس من ما جاني
ما اريدها سرقة ولا مغصوبة = يمداك وإلا قول ما يمداني
وش غاية المحبوب من محبوبة =لا صار يضحك بي ويتحداني
الجادل اللي من ورى عرقوبه=يستر بياضه عن عيون أقراني
يكذب عليـّـه والعجيب اسلوبه =يحبني و أحيان ما يبغاني
عنـّـي احبه و أستسيغ كذوبه= أمسح خطاه بطيبتي وإحساني
أحب صوته لا دعاني صوبه = وأحب اسمه واسم به سماني
وأحب ريح العطر في مكتوبه = وأحب لونه يستفز ألواني
و أحب درجه حين يرفع ثوبه = وأحب هرجه والغنج مجاني
و أحب لعبه لاإحتضن دبدوبه= و أحب حزنه في الخلاء وحداني
راضي بشخصه لو تزيد عيوبه = تعمى عيوني عن خطأ خلاني