مادامت الدنيا للشيخان وملوك=ولو أضحكت تاره تبكّيك تاره
وأخير منها لا غدا الصدر مضكوك=صوت الأذان اليا أرتفع فالمناره
والله لو تملك عمارت وبنوك=وأخوك فالدوله وزير التجاره
واللّي على حول الحرم ملك لأبوك=وفي كل شارع لك ثنعشر عماره
ماتنفعك لأقفوا هلك ثم خلّوك=نهاية الرحله تراب وحجاره
وأمّا بكوك الربع وألاّ تباكوك=وألاّ بورثك ولّع الهوش ناره
ولو تربط الأعمار بحبال وسلوك=مامات قارون ولا راحت دياره
وماقل دل وكثرة الهرج متروك=وأخذ النصيحه في صحيح العباره
لا تأمن الدنيا ولا تأمن البوك=من يأمن الداب الذي وسط غاره؟؟
ولو كبرت الدنيا بعينك وانا أخوك=عند الوفاه تصير كبر الشراره
دنيًا بحر وأنته مسافر بسنبوك=والحظ هبوبً تخلفه عن مساره
دنيًا سواة الورد وألعن من الشوك=و وقتً يموج ولا عرفنا قراره
ياكم أميرًا صار فالوقت صعلوك=وياكم صعلوكً عطوه الأماره
وياصاحبي لن كان تبغى السعد دوك=والحرّ مايحتاج له غير أشاره
فل الحجاج وبدّل الحزن بضحوك=دنياك ماتسوى حليب الحماره
اليا أقبلت ياطيّب الفال مبروك=واليا أدبرت ياعنك ماهي خساره