رعا الله دار عليا لو قسمني حبها نصفين=رسوم اطلالها يشهد عليه السبح والوادي
امر بها وركب الدمع واقف بين جفن وعين=واغادرها وخدي له طريق وقلبي الحادي
سعوديه اليا اكتضت سنابلها على المتنين=سمعت بداخلي فلاح شوق يصيح وينادي
ياعليا ويتمايل خصر نخله وانثني سيفين=وافيق وتختفي عليا وتطلع صورة بلادي
عليها من ضلوعي سور ماهو مثل سور الصين=اساسه من ولا وحجارته من بيعة اجدادي
بلاد(ن) ماتنام الى على سيرة بدر وحنين=وتصحى ترتوي من حوض نبع المصطفى الهادي
لها فوق الثريا عرش واركانه مليك ودين=غضبها سيف ورضاها رطب وترابها كادي
انا المعجون فيها من قراح الماء وطهر الطين=وانا المنقوش فوق جبالها تاريخ ميلادي
وانا طعم المصايف وارتعاشات العنب والتين=اذا طاب الجنا بعد العنا بعيون حصادي
وانا صوتي هدير امواجها في مجمع البحرين=عطيت البحر من ملحي واخذت من البحر زادي
لأني عشتها قصة غرام وملحمة ستين=سروا والليل طعمه موت حالي والقمر بادي
افارقها واحس بجوف صدري غلغلة سكين=واعود لها ويصدح بالحنايا البلبل الشادي
بلادي في البسيطه مثلك القالي حبيبه وين=وانا سيف(ن) بروقك لمعتي ورمالك غمادي
تهادي مثل طفله بين ايادي خادم البيتين=ونامي واصعدي باحلامك لحضن السما الهادي
يكفيك انك بلاد المليك معرب الجدين=وخيرك مايده ماتنتهي للرايح الغادي