ياسلام الله على محمد ولد مطلق لحاله=عد مالاحت بروق الصيف في شرق وشمالي
الجمل ماهو بقد الحمل ونته من عياله=والله إني ماعليه من بعيد ولا موالي

مرحبا بك ياولد جبار والدعوى سهاله = من هجوسن تصرف المعنى مثل صرف الريالي
الجمل لاحملوه الحمل يبن الناس شاله = وان برك ماشال حمله ما يعد من الجمالي

البقا لك ونته أعرف وش مضامين الرساله=كان تعرف للقرايه بس أضنك لالالالي
الجمل هرشٍ كبير وحالته والله حاله=والحموله جايره والحبل من فوق المحالي

كان ماتبغى الجمل ياصاحبي نقطع حباله = والاجابه كيف تاتي دون ما ياتي السوالي
ودنا في حاجتن للضيف يلقاها دلاله = وانت صقرن ماكره ياخوك في روس الطوالي

الدواسر مع بنٍي الحارث رياجيل الشكاله=شفهم فالكرسي اللي راح مرواح الهلالي
جعل براق السحابه ياصل لساجر خياله=ثم تاتينا العلوم اللي عليها الأتكالي

ياخويي ياصديقي كل واحد دون ماله = وان بغيت تحوفها ياصاحبي ياهملالي
انت خلك في محلات المطاعم والبقاله = مالكم فيها مجال ولا لنا فيها مجالي

البلاجيك القديمه أنتهت وآبومحاله=كاملِ في كل حاله آه ياغبن العيالي
أبك حنا يالعتيبي من رياجيل الصماله=قدحنا دايم زنود وفعلنا مثل الجبالي

هيه عانه ساق بنه للعرب وسط البياله = سالين من هم وقته يوم انا مانيب سالي
لا تذكرني زمانن راح قدامه رجاله = لاتذكرني زمان اليوم وايام الخوالي

المشاركة الأصلية كتبت بواسطة محمد الذيابـــي (المشاركة 1239609) ,, صح لسااااااااااانكـ يابو جبار وصح لسااان ابو مطلق طاروق مميز ورائع لاهنتو جميعاً ,,,,,