اعلاج قلبي وقلبك وطبه =ياعلي شوف الفضا والصحاري
ومنزل براس الفرع ولا مربه= اما يمين الفك ولا يساري
واليا نزلنا النار عجلا نشبه =برض دمث تشوف فيها الخضاري
وفنجال سوي مابه الني حبه=حافه لنا فياض للكيف ضاري
والماء طبيعي في قربنا نصبه =من عد ولا من مشاش وخباري
ونشوف من تلبس عصابه وجبه=وعلى العصابه يابو فارس مباري
ماهن بنات اللي على الباب ضبه=بنات بدو يبعدون المساري
بنات بدو كل قفر تطبه=يرعون قفر وسومها والبداري
مانال منهن راعي البوق حبه= يلقا كلام مثل طعن الشباري
واليوم في بيت حديد وصبه =قفل علينا مانشم الذواري
ياخلفة اللي ماتعرض مسبه =لوهو بوقت اليوم قيل انتحاري
ياما قطع فوق النضا كل خبه=ماهاب جمع الهمش وجموع ضاري
الوقت دار وبان يالقرم غبه=وقت يشيخ فيه راعي المصاري
ابو حقب للحر الاشقر تشبه =ولتكذب ان قالو يصيد الحباري
وحنا علام ايامنا مشلهبه=وحنا عيال متعبين المهاري
العبد ماله غير تدبير ربه=اللي كتبله عالم الغيب جاري
الطيب ينشا بالرجل من مشبه =ماهي تجاره بين بايع وشاري
خل الردي رداه خله بعبه=جنب مزاج اللي مزاجه تجاري
اتعب على خوة عمر لا تكبه=هداج تيما مابطيبه قماري
اليا بدا لازم لبو بدر لبه=وانا علي قضيت لزومه اجباري
عمر ذرانا عن صلايف مهبه=يعلي لاقلت علينا المذاري
ألذ واحلا من شهاليل جبه=وألذ واحلا من حليب البكاري
عساه يسلم والمرض مايطبه=في جاه من كون ليلها والنهاري
عسى المزون اللي نشت مشنخبه= من غرب جتنا من غزير البحاري
عجلا رفيف بروقها تلتهبه =السيل لثعول السحابه يباري
يسوقها الله يم ديره نحبه =لارض الفلايح بالكرك والمزاري
ومنه على الصوان كله تذبه =وعلى الطبيق العفر والسماري
كل يربع ياعلي في مطبه =وننزنا انا وياك شرقي مغاري
وهذا علاج القلب وشفه وطبه= لوكان هذا حلوم ليل وهذاري