الهيـــــــــــــلا *** منتدى قبيلة عتيبة - يـاماحـلا الـمســرى مـع طرة النور / مـن قبل خيط الشمس يبدي شعاعه

/
/

يـاماحـلا الـمســرى مـع طرة النور
مـن قبل خيط الشمس يبدي شعاعه

مـع رفـقـــةٍ مافيهم اللي بــه قصور
ربـعٍ تــربـــوا عـالكـرم والشجـاعه

كـل واحـدٍ فيهم مجـــرّب ومخبـــور
مـاشـاور الـحرمه بـخـــوة ربـاعــــه

شيل الشوازن والفشق معهم صقور
وحـمام لا صاروا طيورك جواعه

مـوترك جيبٍ خلفه العفش مجرور
يـسوقه الـلي خـاف ربه وطاعه

وجمسٍ محمل ما ركب فيه مطيور
هـو مـنوة الـلي مات قلبه وباعه

عـفشك مـكمّل فـيه زلٍ وماطـــور
وبـيتٍ من (القاضي) جديدٍ شراعه

وعـدة الـمطبخ بـين قـــزٍ وتنّور
وحـوايج واغـراض فـيها نفاعه

ورز(الـمهيدب) مع سكاكين وقدور
واحـرص على الطبّاخ كمّل متاعه

ونـجرٍ ومـحماسٍ ودلّـه ودافــور
وبـنٍ وتـمرٍ يـغري اللي شباعه

تـنزل بـروضٍ توّه اليوم ممطــور
والـغيم عـقب الشمس تم انقشاعه

الـبر حـولك كـله ورود وزهـــــور
وقـت الـربيع العشب زاد ارتفاعه

حـتى الرمل تشتم له ريحة عطور
والـقاع خـضرا كـن فيها زراعه

معك خروفٍ مايبي ضرب صاطور
اذا ذبـحـته عـلّقـــه مـن كـراعه

احـمس بـصيله والمعاليق عالفور
مـن طعمه الجوعان ياكل صباعه

مـن عقب هذا ما تبي طب دكتور
كـانك مريضٍ صار عندك مناعه

حـنّا بـنعمه بس تبي حمد وشكور
وحفظ الصلاة الخمس ويّا الجماعه

مـا تـغتني لو تملك المال وقصور
لا صـرت مـا تملك كنوز القناعه

/
/