طلبت ربّ يعلم السر والغيب = يقبل صلاةُ لي ويقبل صيامي
ويجعل لنا عرض نزيه عن العيب = ويفكنا من شر سوء الاثامي
إبن آدم ملفى الردى والعذاريب = لو ما فعل رميت عليه التهامي
جلّيت عن نفسي شبا الشك والريب = ولا حسب يلقون العرب بي كلامي
وربعي لقوبي عقب شيبي عذاريب = بتسطير كذب أمفسرين الحلامي
قلت اخبروني ويش مغضا هاك العيب = قالوا على ساقت رفيقك تحامي
قلت إن هذا من قديم لنا عيب = مستارثينه من خوال وعمامي
العيب ترك المعرضه بالمواجيب = والاّ الرفيق إبفزعته ما يلامي
رفيقنا كنّه بروس الشغانيب = يجبر بنا لو مكسره بالعظامي
رفيقنا ما نجدعه للقصاصيب = في راس حيد نايف ما يظامي
ورفيقنا لو هو من الجد بصليب = معلّق منا ذروة سنامي
والشر ما نسعى بجرّه بتقريب = وندري إلى هبّت لنا بِالاَ ولامي
هذي قدايمنا إلى عدو الطيب = وكل يريه الفعل أهله القدامي
ويوم الوغى ما نستشير الزواريب = لا طار عن سود العيون اللثامي
مركاضنا يشبع به الطير والذيب = ونروي معاطيش السيوف الظوامي
نلحق على سرد يجنّك جناذيب = بمطارق مع مثل صف النعامي
يتلون ابو بندر ربيع السعاييب = اللي على خيره تعيش اليتامي
فإن سِلم راس امبيّد الكنّس النّيب = حريبنا ما يهتني بالمنامي
غنّوا بها اركان عوج المصاليب = من مصر الغربي إلى دار يامي
شارخ اخذنابه زبون المهاليب = وش جاب سطوة مطبر وبن لامي