يا عيال يا مترحلين حثاحيث = خضع المقاود والمناكب وساعي
بعضودهنه بان وسم الملاكيث = اسداس لافطر ولا هن زعاعي
شعل بهن من فزت الريم تشقيث = يوم ادبحن مثل انزعاج السواعي
تريضوا لا ريضتكم لوابيث = لما نقول بفالكم والوداعي
اقدوا عن الدرب الوعر والشرابيث = واللي عليهن كل قرم شجاعي
العصر من لينه شعوهن شواغيث = سمح الوطا عن كل سندا رفاعي
ومروا اهل حايل رقود مماكيث = من قبل ديك المذن اول يعاعي
ومصباحكم بين البيوت المثاليث = لابد يدعيكم على العرف داعي
واليا نشدكم صاحبي قال من حيث = قولوا لها من غير كثرة نزاعي
يازين صرتي بين دور وحراريث = يادرة باغلى ثمن ماتباعي
يابو ثمان كن فيها العسل ديث = يبري عليلات القلوب الوجاعي
ما طورقت بعيونها ( ....) = ولا وايقت باثر المقافي تراعي
ولا سولفوا عنها العلوم الطراميث = وعنها السباع مجنبات جياعي
والله لوني من ورى الطور والليث = ويحول من دونه ديار قطاعي
ارجيه رجوى ممحل يرجي الغيث = وباقصى الضمائر شارع له رواعي
عقبه يرج القلب مثل المحاريث = ويقلي فوادي مثل سم الافاعي

البارحة يوم الاوادم مرشه = عيت عيوني تستلذ الفراشي
ويامل قلب طول البين غشه = والحال مما بالفواد متلاشي
عليك ياللي زرع قلبي يحشه = من عقب ماهو بين الاضلاع ناشي
حش الدبا لقصار زرع يدشه = رهوم كتفي على القاع راشي
ياروع يازملوق عشب بدشه = غاذيه من غر السحايب رشاشي
زولك صغير وقمت عنا تخشه = وقصرت رجلك ياقليل المماشي
( يا ورع عطني من ثناياك نشه = لوبس من حمر البراطم نواشي )
ترى الدسم يكفي منه ذوق مشه = والهزل مانبغاه لو هو بلاشي
هرجك على قلبي نقاريش طشه = احلى من الما للقلوب العطاشي
والبيض غيرك مثل حوش المقشه = وايا غزال الريم واي الخشاشي
ورع صغير وشد قلبي وهشه = هش الهواء ارض على جال طاشي
واو مابي اوماي العصا بالمنشه = او ماي هجن يبعدن المعاشي