يالي تمشى بين ابو ظبي وعمان = عقب التمشي عفت جو القرارة
دار لنا تفرق عن كل الاوطان = لو جوها مابين برد وحرارة
سمومها اغلى من هوا جو لبنان = وجبالها تسوا قصور وعماره
تأسست بالدين في دور سلطان = وذوي عطية كلهم وسط حارة
حنا بنيناها على مر الازمان = ياعنك مانحسب حساب الخسارة
فيها عيال العود ذربين الايمان = بأفعالهم نحتل عال الصدارة
حامينها يوم المغازي والاكوان = أنشد مواجه والي جرا في جواره
وانشد عن المصلوم كان انت غلطان = وانشد طلال ومن برز في نهاره
وانشد صباح السور عن كاين كان = يوم الشتيلي طاح والرب اجاره
وانشد عن الي فك حلوات الالبان = يوم الرمك والجيش جا له معاره
فابو دخن جا لأشهب الملح دخان =وعيو عليها اخوان شما جهاره
وابن رشيد الي سكن قصر برزان = منقيته جينا بها من دياره
سلم على من سالمونا وخلان = وعدونا نسقيه كاس المراره
في ما مضى حنا اهل البوش وعنان = واليوم عصر التقنية والحضاره
الضيف نذبح له سمان من الضان = ولا القعود الي عريض فقاره
هذا تراث اجدادنا يابن الاحسان = موجز ومثلك الي يكتفي بالاشاره
وعسى السحاب الي يجي فيه ربان = يسقي الفياض وكلنا بزباره
نحبها ومن الوفاء حب الاوطان = لا شفتها كني وزير التجاره

سمعت لي مكتوب صادر على ان = فيه الشطاره والجزالة مهاره
شيدت ساسه لاهل القوافي بنيان = طوبة على طوبة نقوّم جداره
الحر ياطير السعد طير حوران = لو لف كونه مرجعه في وكاره
وان كان صاحبكم لبو ظبي شفقان = يطلب من الجمرك صدور استماره
حنا عيال العود لاثار بركان = حب الرحى لادار نازن عياره
يوم الدعاوي شلف ورماح وحصان = كلن على جهده يقلط مهاره
نارد بقب كنها فرخ شيهان = يشهد لنا تاريخنا بالجداره
وسط العذية نوخ القوم ركبان = ومن القرارة منبع اهل الاماره
نحمي دخيل القوم واذكر عبيان(*) = عيونّا دونه تقادح شراره
نحما العطاوي في مراتيع ذيدان = من شافها قفى وعجل فراره
رمح الحبردي للمشاكيل عنوان = بوابة عنيزة عليها شعاره
فأم المعارك لاغدا العلم نيشان = سقنا جملنا والشجاعه سطاره
ومطلق حمى بالشلفا والسيف شامان = من دون وجهه شب للضيف ناره
وقت مضى فيه التواريخ برهان = لافرع المبسم نبيّن ستاره
واليوم ننعم وسط روض وبستان = فيه الامن نجني ونقطف ثماره
وانت ياغازي من رجال لها شان = حر تسلسل تقدح بك النعاره
هيّضني قافك دون شك ونقصان = والحقت لي غاره على جو غاره
انت وزير للتجاره بليهان = وانا على داري وزير السفاره