خط لفاني صبح الأثنين عجلان جابه ذعار وكل هرجه وقاعه =
خط مزرف فيه تمثيل قيفان بقيت ادزه يوم جا للإذاعه=
فيه الكلام الي على كل نيشان ودخل ببحر يصطفق به اشراعه =
وذعار يشكي من سعيد وعمران وشكواك وصلتني وسمع وطاعه=
لكن وش نعمل بغانم وعيفان وصبر على كل المشاكل شجاعه=
خلك كما حر على راس مزبان وساع مخاليبه طويل ذراعه=
صيده من الجزلات غالية الاثمان واعن الطمانه ماكره بالرفاعه=
ومن لايودك لاتزور ولو كان لو كان بيته عنك ممشاه ساعه=
ابعد عنه والرزق في كل الاوطان وتلقا الغوض به من خيار الجماعه=
وارض الندى تنبت شمطري وريحان والا الصبح مانابت به ازراعه=
والناس كل له طبيعه وميزان يفرق عن الثاني بشبره وباعه=
واحد الياجيته دخل قلبك ايمان مع الرجال الطيبين اجتماعه=
واحد يحب الشر وفي الخير كسلان متعلم علم الردى والدلاعه=
وصنعته جمع السوالف ببهتان ويزيد من عنده ردي البضاعه=
واليانصحته قال ماني بغلطان واليا هرج محد يحب استماعه=
يجيبها من غير حق وبرهات ويهدم بها بيت وساع ارباعه=
وانا ترى في هذا الوقت عجزان ماعاد عندي للنشاما سباعه=