قلت في مردّي عليه

مرحبا باللي معانيه القويـّه
تفرض الترحيب وجزال التحايا

شاعرٍ تضرب له العالم تحيـّه
شيخ عرفٍ من وسيعين النحايا

ممتلي راسه سعاطير وحميـّه
يوم غيره ممتلي راسه كوايا

افتخر به وإن نصاني قلت حيـّه
وأبشر بحل الدعاوي والقضايا

انت ضيف الله وضيف المقدريـّه
لو توردها على حوض المنايا

ما عليك من العلوم ولا عليـّه
كلبونا من بعيدين النهايا

ما نحسب حساب نمله فارسيـّه
قد توطينا على روس الحيايا

احتزم بي لعنبو راع الرديـّه
بالحرابيـّات والا بالحدايا

كم سترنا لا عفينا من صبيـّه
وكم خذينا لا بطشنا من سبايا

ولو نلد العين في هذي وذيـّه
ما بقى في الارض للخمه بقايا