يوم(ن) من الايام قلي حضرة المفتي شفيق = ياشاعر افكارك عن اقكار العرب متحوله
والشيخ ماصلى وصام وحج للبيت العتيق = لكن يفتي ويتحكم بعد زان الجو له
قلبه مريض ولا لقي نعمه على مسلم يضيق = يشتم لراع الضو يالعراف من لا ضو له
ما يدري اني هامتي زادة على هامة طويق = لي وقفة(ن) يشهد بها ماهي علوم مقوله
يرمي علي الوقت حمل محد اله غيري يطيق = واكرب حزامي واتعزوا والحمول متوله
كله من اجل الرفق لو مالي بهالدنياء رفيق = وقتي تهاويله كثيره والعباد مهوله
تدفعني النخوة وانا خلقت للنخوة عشيق = اقسى على روحي واثابر لجل كسب الاوله
الاوله هي مقصدي والتاليه لي ماتليق = التاليه ماهي بلي للعالم المتسوله
شاعر فصيح القول وذراعي على العايل طليق=لايمكن اتاثر علي اهل الحس والهجوله
ماشي على منهج صحيح وفي حساباتي دقيق= واللي مشى بالدرب ياصل لو مسيره طوله
ارصد على الشاشه هدف واحذر مفاجاة الطريق= اللي مرسم خطتي يومي بديت منوله
ماني بمرضي كل خلق الله هذا العلم الحقيق = والناس ماهي كلها بالانتقاد مخوله
موجود في صفي فريق وضدي مشكل فريق = والهرج واجد والعرب حسب المزاج اتوله
اسمع لمنصف واتجاهل حاقد(ن) ينعق نعيق = نذل(ن) بنقل الكذب مثل الباعه المتجوله
يطلع بعيد او للاسف يطلع ولد عم(ن) شقيق = تافه وانا ابا اختم الموضوع ليش اهوله
اترك قليل الخاتمه حشمة هل المجد العريق = والصبر مفتاح الفرج والفوز كسب الاوله