بسم الله الرحمن الرحيم

قصيدة وطنيه للشيخ/فهد بن محمد بن ريف المقاطي العتيبي يقول فيها:

يقول من يفهم ولا يعلم الغيب=ويخاف ربه والنعايم حمدها
ويقول من يفهم ولا يمشي العيب=ويستر عيوب الناس داخل مهدها
ويقول من يفهم ويخشى العواقيب=ويداوي الغلطة ولا يعتمدها
ياجاعلآ للرجل لحية وشانيب=وياخالق خلقك ومحصي عددها
نطلبك من غيرك يوفي المطاليب=نطلبك قدام ايتلهب وقدها
تغفرلنا قدام حمو الملاهيب=وقدام تسحبنا المنيه بيدها
وقدام لا ننزل بجوف السراديب=وقدام لا يطبق علينا لحدها
يطلبك من جرب الوقت تجريب=وأعمال وقته كلبوها رصدها
ويطلبك من شاف العجب والتعاجيب=وبعض السوالف فالمجالس نقدها
منها النميمة والغدر والتقاليب=والبعض لا جات المشاكل كردها
وكثر الذنوب اتغيب العقل ويغيب=ولا عاد يعرف كم ليلة رقدها
وترى الطمع في المال جاب التحاسيب=وينسى المصلي كم سجده سجدها
وبعض المعاني تحرق الراس ويشيب=وأهل الحسد قام ايتزايد حسدها
وبعض الليال اتودب الرجل توديب=وتهجد قليل العرف قبل ايهجدها
وبعض الليال اتبشر الحظ ويخيب=وتخيبه لامن توخر سعدها
والطيب اللي يلحق الطيبه طيب=ويعطي الرجال حقوقها ماجحدها
ويقابل المعروف وبكل تأديب=ويميز الكلمة ويعرف رددها
ويقصر كثير الهرج حتنه ايصيب=كثره يجيه بكلمة ماقصدها
والناس قدام المخالط أجانيب=واليا عرفت الناس تعرف سددها
والجار اله تقدير غير المواجيب=وله احترام وقدر زايد عددها
والضيف نعطيه الشحم والتراحيب=وندور العاني لزومه وجدها
والمعرفه ماهي لمن راح ويجيب=ولاهي بعد لكل واحد وردها
بعد العوارف روحت في الدواليب=وصكو عليها الغشم واروح جسدها
واللي يعرف العلم أعطيالمجانيب=والمعرفة والعرف كنه فقدها
واللي منول مايفك المناشيب=رافع لها راسه وربي قردها
وياللي تقول الحق فيك العذاريب=وكلن برجليه الحقيقه لبدها
والرفقه أعماها نزول الحواجيب=وراحت على الصامت ومنهو نشدها
وأشكل شكيل الناس هرجه تلاعيب=واليا جلس جاب السوالف سردها
تبدي مزوح وتنتهي بالأكاذيب=فالأوله والثانيه وش بعدها
وبعض العرب يفرح بهدم المحاريب=ويفرح اليامنه تعاقب هددها
والبعض الآخر حب عوج العراقيب=وحب البعض للي تريم ولدها
والبعض حبه لمهات الحراديب=اللي لها بارود يدفع زردها
وبيت العداله جودته الاطانيب=ولا ترفع الخيمه بليا عمدها
ولا همنا الشوعي وحرب الأنابيب=ولا همنا لو الجيوش أيحشدها
اللي مهم امروجين الاحابيب=اللي تبا تعمي العيون ابرمدها
رحنا ضحاياها ورحنا مصاويب=يالعن أبوها وأبو الي عبدها
واما حربناها بكل الأساليب=والا ترا غطا بحرنا زبدها
ومن غير أبو متعب يصفي المشاريب=ومن غير أبو متعب وشعبه صمدها
ومن غير أبو متعب يمد المخاليب=ومن غير ابو متعب وشعبه حصدها
وحنا سعوديين وقت المصاليب=من عزوت تحمي قواعد بلدها
وحنا سعوديين يوم المشاهيب=براقنا فالحرب يسبق رعدها
ودون الوطن والدين والفطر الشيب=لو شبت النيران حنا سندها
والأم نحميها من الكلب والذيب=اللي طوال العمر نرضع نهدها
وموت الشهاده عز تحت الاناصيب=ولاجل الشهاده لزم نبذل جهدها
وخذو كلام امرتب القول ترتيب= الفاهم اللي جابها ماشحدها
وصلوا على خير الرسل والمناديب=حت السما تمطر وينزل بردها
امحمد المختار زين الهناديب=اللي مشى كل السهول وجلدها