بسم الله الرحمن الرحيم



السلام عليكم ورحمة الله وبركاته





إخوتي الكرام



أعود لكم بجديدي في شعر النظم



وبهذه الأبيات الوجدانيه أتمنى أن تنال الرضى





وهي متوفره صوتيه



http://www.youtube.com/watch?v=jpD7uDCvOBo

سلام الله على العذب اللطيف الناعم الفتان=سلام الله على سحر العيون ومابدا فيها
سلام الله على القلب الحنون ونبضه الولهان=احس بنبضته في داخله واعرف معانيها
كأنه يوم ينبض يرسل الأشواق للشريان=وشريانه يوزعها على جسمه ويبديها
أحس بنبضته كلمة(أحبك)من أرق انسان=واحس بضحكته شمعة غلا دنياي تضويها
حنانه يقلب الضيقه سرور ويطرد الاحزان=ويازين المشاعر يوم ياخذها ويعطيها
احبه كثر مايطري علي ويشعل الوجدان=كثر مايهدي اعماقي سعاده يوم يلفيها
أحبه كثر زين يحتويه وفي عيونه بان=كثر ماهمسته تسحر سموعي يوم توحيها
واحبه كثر ماقلبه نظيف وبالوفا مليان=كثر ماتشتعل نيران شوقي ثم يطفيها
أحبه كثر ماجاد السحاب وصادق الامزان=بغيث يسقي وساع الفيافي لين يرويها
أحبه كثر ماله فالخفوق وفي عيوني شان=كثر مايصنع البسمه على شاني ويهديها
نثرت اعذب احساسيسي قصيده باعذاب الأوزان=بدايتها على آن ونهايتها على إيها
على شانه ليا منه قراها ينتفض فرحان=يرددها من الفرحه ويرجع لي يغنيها
واردد له هلا والله وحشني صوتك الرنان=هلا والله فديت الهمسه الحلوه وراعيها
ويسألني(وش أخبارك)؟وش أحساسك معاي الان؟=وهل باقي مشاعر داخلك مازلت تخفيها؟
واقول أخباري اني في وجودك يااجمل الخلان=كأني مالك الدنيا من اولها لتاليها
وإذا باقي بصدري شي مايستحمل الكتمان=ولهت لشوفة عيونك عسى عيني ماتبكيها
واذا ودك تشرفني بداري سجّل العنوان=مابين ظلوع صدرك يالغلا بايسر محانيها
يجاوبني خجل واضحك طرب من ضحكة الخجلان=واقول تدوم هالضحكه عسى ربي يخليها