الشعر فن وله قوانين واسلوب = ماهو كلامٍ كل شخصٍ يجيده
احيان اصير بحضرة الشعر مطلوب = ابذر له افكاري وتنتج قصيده
ياغاليه جتني مراسيل محبوب = تحمل طوابعها الديار البعيده
تحمل بصفحات الامل شوق وعتوب = شوق الحبيب اللي كتبها بايده
وتملك احاسيسٍٍ بها شي مرغوب = رغبه لماضٍ فات لازم نعيده
وقت مضى كله متاهات ودروب = حتيش لو قلتي لحالك وحيده
من يغفر اذنوبي اذا بغفر اذنوب = سبحان من يغفر خطايا عبيده
لعبتي بقلبي على كل دالوب = وشتتي أحلام الحياة السعيده
قلبٍ ملك في حبك أوطان وشعوب = ارخص لك الغالي وينبض وريده
دستيه باطراف القدم لازم ايتوب = وعقبك تهنا في حياةٍ جديده
خمسة عشر عامٍ من العمر محسوب = بعتيه في لحظة دقايق زهيده
واليوم جيتيني تقولين باتوب = منتي لحالك في حياتي الوحيده