حفلة ساجر....حبيب والقرقاح
 

السلام عليكم ورحمة الله وبركاته


بمناسبة انتهاء اختباراتي على خير اليوم في الUniversity :D تفضيت وكتبت لكم هالمحاوره الرائعه بين العملاق بن ريفه والعملاق ابوفيصل


وصراحه انجح ثنائيه بعد حبيب وسوار الذهب من وجهة نظري ...... لحد يبلشني :p


طبعا الحفله كانت في ساجر عند الكراشمه وهي نفس الحفله اللي فيها محاورة الشيخي الساخنه مع حبيب اللي يوم يقول الك 500 ريال وهات لي بيت القصيده


اترككم مع المحاوره والله الله بالردود ترانا معطلين :D


حبيب

مرحبا ترحيب سلم وساير ن بين القبايل *** ان لفيناهم يقولونه ولا جونا نقوله

يافلاح انته تشيل الحمل مير الحمل مايل *** ماعرفنا الميل في مشيتك والا فالحموله


فلاح

البقاء واعداد ماهلت هماليل المخايل *** بارك الله فالرجال اللي يعرفون الرجوله

والله اني ما ابرك بحملي وانا يابس بلايل *** ماني بمثل الضعيف اللي تنوخ به ذلوله


حبيب

الاوايل كان ماتدري ترى حنا الاوايل *** الله اللي عزنا خلا امنا ترضع رسوله

خايف ن ترمي رسنها وسط ميدان الاصايل *** باركه ومعقله لو كان ماهيب معقوله


فلاح

والله انا اللي على الكون اثقل من جبال حايل *** مجدكم معروف لكن مجدنا منتب بحوله

ضاقت بطون الدروج وضاق صندوق الرسايل *** والعميل اللي قرب ثوبه خذى حق العموله


حبيب

مجدكم لاتحسبونه دايم ن ماهوب زايل *** كان شامخ ثم جينا وانتهيتوا بالسهوله

الدروب مبرحه ياللي تضيعون القوايل *** صدق منهو طاول اطول منه لايمكن يطوله


فلاح

مجدنا مازال واللي زال روس اهل الصمايل *** انتم دويله لها قوه لكن قحطان دوله

فيه ناس ن كل ماضاقوا يسوون الهوايل *** سم بالرحمن يا حبيب ترى الارض محلوله


حبيب

ويش جلاكم بنص الليل ياعيال الحمايل *** واحد ن مااسرع شديده واحد ن مااسرع نزوله

ياقحطان انتم بلا شكه تشبون الفتايل *** مير وطيتوا رجل واليد ماهيب مغسوله


فلاح

ويش خلاكم تسوقون الضريبه فالقوايل *** والله ان كبودنا من بارد النصر مغسوله

العلوم اللي بديت بها لها يمك دلايل *** والله ان الوجه وجه ابو نجر والزول زوله


حبيب

مانسوق الا ضعاينكم مع بطون المسايل *** يوم تسري مرتبش والحرب مادقت طبوله

والله اني لو يدي تقضبكم يوم الدم سايل *** لا طرحك في دم اخوك ولا خذ حزام البطوله


فلاح

كم خذينا من هل الطالات وافين الخصايل *** خيلنا طاعت وضيف الله قعد يعسف ذلوله

لو تقابلنا يوم ن كل ن يبا برد الغلايل *** يمكن ان العازمي ماتقدر تشيله رجوله


:rolleyes: حبيب مايخلي حركاته والقرقاح قوي وهذا اللعب الكايف اللي مايزعل احد


وهنا المحاوره فيديو


http://www.youtube.com/watch?v=Q55n2...eature=related

اولا الله يوفقك


وعقبال الشهاده ترز الدكتوراه ولا احد من المنتدى ينشب لك



اما عن المحاوره




حبيب قصه يروق اذا لعب مع القرقاح


يافلاح انته تشيل الحمل مير الحمل مايل *** ماعرفنا الميل في مشيتك والا فالحموله

البيت ذا احس فيه مطب

لاهنت يالوازعي بس انا كاتبها مانقلتها

الله لايهينك يامحمد ويجمل حالك

اما المطبات يجونك اهلها هالحين :)

بيت اعجبني

مانسوق الا ضعاينكم مع بطون المسايل *** يوم تسري مرتبش والحرب مادقت طبوله

لاهنت مره اخرى

لا هنت يا المرشدي على كتابة المحاوره


و محاوره كايفه .. و جميله جدا


و اعجبني بيت فلاح القرقاح و بيت جزل جدا



مجدنا مازال واللي زال روس اهل الصمايل *** انتم دويله لها قوه لكن قحطان دوله



و عسى الله يوفقك .. و ان شاء الله نفرح فيك بالنجاح

يا سلام يا سلام أي بالله طارووق اذكر كان اول طارووق في الحفل



ابداااااااااااع من ابو محمد وابو فيصل ابدااااااااع ابدااااااااع




أعجبني جدا آخر بيتين حقيقة قوّة فتل وقوّة نقض


يقول حبيب :
والله اني لو يدي تقضبكم يوم الدم سايل *** لا طرحك في دم اخوك ولا خذ حزام البطوله


ورد فلاح :
لو تقابلنا يوم ن كل ن يبا برد الغلايل *** يمكن ان العازمي ماتقدر تشيله رجوله



هؤلاء هم الشّعّار الكبار وهنا تتجلى المقدرية الشعريّة



أشكرك يا محمّد وعقبى لي اخلص بعد هههههههههههه