سر ياقلم والزم حدود اللباقه=خل الخطاء درب الخطاء للمطافيق
اليوم ابا اهديلك من الراس باقه=باقة شعر ماهيب باقة عشاشيق
ياهاجسي والصدر زاد احتراقه=والهم طاولني وانا ازريت لا افيق
تكفى طلبتك لاتجي فيك عاقه=ماجيتك الا خابرك حزة الضيق
انت الحزام اللي شديد وثاقه=وانته كما حر(ن) تعلا الشواهيق
مادام همي ظامني باختناقه=انته خراجي بعد رب المخاليق
خل القلم يكتب بفن ورواقه=تاج البيوت اللي عليه الطواريق
جرحن يجيلك من يدين الرفاقه=انا اشهد انه يكسر الظهر ويعيق
وهمن يصيبك من وجيه الصداقه=اثقل عليه من حصى كشب وطويق
قد قاله اللي ماهرج بالحماقه=الطيب بين الناس وهبه وتوفيق
يالله عسالي مع هل الطيب طاقه=ولاينثني متني عن الحمل واعيق