العشاير في هواهن تعبني لشاعر بدرالقوس
 

العشاير في هواهن تعبني ** تعبني وابعدني عن هوايه

هيضني بالقوافي يوم اغني ** والطيور يجاوبني في غنايه

في فياض(ن)نبته(ن)طال متثني ** طايل(ن)نبته وعود بنحنايه

يم قذله والمجاذم ربعني ** ربعن شهرين مرباع(ن)كفايه

ويوم شان الارض عنهن شرقني ** واكملن مرباعهن بأتم غايه

في نفودن تحجب الصمان عني ** من جنوب اليا شمال بعرض جايه

في خببها القود دايم يرتعني ** مدهل البدوان قبلي بالبدايه

ويوم طاح الصيف يمه سندني ** وباشرن النبت في وقت استوايه

بالشفا مربا العشاير صيفني ** كل وحده نيها مثل البنايه

كالهضاب النايفات اليا زمني ** كسب اهلنا ماخذوهن بالشرايه

مثل ضلع النير سود(ن )يعجبني ** معدن البل ماعلي من الدعايه

ياخذن القلب معهن لامشني ** كل ملحاً شيٌفه غاية منايه

الاذاني بالصناقر يجذبني ** مثل اذان الذيب فيهن احلايه

وجهها ضافي من اللي يرغبني ** طافحن غضروفها مابه وطايه

ورقبتها كامله من كل فني ** منوة الوبال مافيها حكايه

صدرها سناد ماهوب الادني ** والسنام موسطن فيه اعتلايه

فاهقن يم الحجب وينوشهني ** والفقار مجمله عالم خفايه

ذيلها ضافي وعرقوب متحني ** ماتصد العين عنها بالغضايه

والخفاف اكبار والمشي متوني ** من جميع الزين فيها كل شايه

طولها عنها الايادي يقصرني ** وجنبها تسعه وفيهنه رهايه

منوة الحلاب ترزم ماتحني ** والحليب اصطول والطبع الهدايه

واسمحولي واسمع الاوصاف مني ** واعذروني كان مخطي في خطايه

لشاعر بدر عبدالرحمن القوس

صح لساااااااااااانه