هاضت تعابير الثناء فالقريحه=للشاعر اللي للجزيله مخوّل
فالح وأنا أقصد في عباره فصيحه=هو شاعر المعنى وهو صدق الاوّل
يافالح إن كان الليالي شحيحه=حظك تراه مع النشاما مطوّل
أشمخ عن المترديه والنطيحه=واللي رقى لا طوّل الوقت حوّل
ياشاعرٍ وقفتك دايم صريحه=ما أنته من اللي بالقصيد يتسوّل
أنت الذي جالك على المجد صيحه=وانت الذي للشعر الاصلي إموّل
شاعر ومن نسل الشيوخ الفليحه=اللي على المجد الرفيع أتجوّل
أحرار من خير الحرار الجريحه=هدتك هدت حر ما هو تزوّل
وإن كانها بسيوف زينه وليحه=سيوف ربعك فالمواقف تهوّل
عدوانهم وقت الملاقا طريحه=لكن زمان أول يافالح تحوّل
الصيت يشرى مثل شري الذبيحه=بالمال ولا الفعل..... خبرك من أول
أظهرت من صدري رموز الشريحه=والعلم يم أهل الحقيقه معوّل
تمت وأبا أختمها بجمله صحيحه=جملة ثناء بالطيب دايم تأوّل
تعيش يافالح وشعري مديحه=يزهاك ولا المدح يمك ينوّل
وبيوتك اللي بالمعاني رجيحه=غدت مثل بين الخلايق مقوّل