مبداي بالفرد الصمد رب الأرباب = سبحانه اللي كلّنا نلتجيبه
اللي دحى أرضه ورسّابها أطناب = بسمه طواريق الشعر نبتديبه
اللي نصر عبده على جمع الأحزاب = دحر جيوش الشرك وأظهر حبيبه
اللي بعث لإبن آدم القاتل غراب = حتى يسوّي مثله ويقتديبه
امعاون النملة على بذل الأسباب = اللي يشاهدها ويسمع دبيبه
فيه أبتدي ماغيره اليوم غلاّب = العز بيده والظفر والغليبه
هاتو لي بوكي والقلم واجفو الباب = حالي مع القيفان حاله غريبه
خلوني لحالي ابكتب لي كتاب = مشاعري من واقعي مستصيبه
هاض الخفوق وهاجس الشعر شباّب = واسترسلت خلج المشاعر ذهيبه
من دار أخو نورة إلى دار الأحباب = دار الصباح أرض الكويت الحبيبه
شاعر يترجم مالجى فيه بإسهاب = آساعديٍ من سلايل عتيبه
يسند تماثيله على الشمري (شهاب) = اللي شعم ناره براس الشذيبه
الأسلمي حلو النبا ريف الأصحاب = راعي اللحيسة والعلوم المنيبه
ياشهاب من هم الدهر عارضي شاب = ومن واقع الأيام حالي كئيبه
ياشهاب دنيانا تطوّى تكل داب = نيبانها تضرس ويقرش ذنيبه
ياشهاب كم لاعت مواليف وأحباب = وكم فرّقت بين الحبيب وحبيبه
ياشهاب قلبي من تبهلالها تاب = عفت الحياة وكل شيٍ تجيبه
ياشهاب كلاّته تكاليف واتعاب = الناصح اللي مايوارد قليبه
ياشهاب حتى الذيب جايع ومرتاب = من هولها والكلب يقنب قنيبه
ياشهاب مايبحل بها كل لعّاب = والطالب المطلوب أصبح طليبه
ياشهاب وش علم العرب صارو أحزاب = أحوالهم ياشهاب صارت عجيبه
ياشهاب راع المصلحة صار كذاّب = يومي نخيته زل ربي حسيبه
حتى الخوي ياشهاب فيه الرجى خاب = جحد جهودي له ليالٍ عصيبه
يوم الرخى تلقى لك أحباب وأصحاب = وان طحت حطّو فوق راسك نصيبه !
آخر مطاف الآدمي حفنة تراب = والله يجنبنا السعير ولهيبه
وصلاة ربي عد ما سالت شعاب = على رسولٍ كلنا نحتذيبه

لا هنت يامرزوق
كلي شرف يعلم الله بتواصلك ومخامسك ياحيي

/


دُمت بود

محمد الذيابي
صح بندك ولاهنت
والله يسعدلي مساك

//

دُمت بود

تسلم يابو طالع والله لايهينك
مرورك وحضورك شرفني

/

دُمت بود

محمد العتيبي
مرورك شرفني وولوجك أسعدني
الله لايهينك وصح كلك

/


دُمت بود