يامشغل الفكر خل الفكر في حاله=مافاد فيه الطبيب مداوي العلّه
الوقت قاسي عليه وعقّد حباله=صعبت حبال الرجاء ماهيب منحلّه
بعض المفاهيم فال الله ولا فاله=خاطي وراعيه مايسلم من الزلّه
فكري لحاله وقلبي رايح لحاله=وش عاد أسوّي بعد بانت به الخلّه
وأنا لو إنّي عقلت كحيل بعقاله=اليوم عندي على سطح القمر فلّه
لكن قامت بنات الوقت تبرى له=تقص أثر سيفها اللي مرهف السلّه
وإسطول بحر الهموم أرسى على جاله=يقوده الحظ لين إنه توصل له
من يوم واجهت ذاك الدرس وسؤاله=الدرس مفهوم وسؤاله صعب حلّه
الشطر الأول بغى ينحل من حاله=والشطر الآخر صعب في خاطري كلّه
أصعب من أرض الحجاز ونايف جباله=فيها العسر والوطا ودروبها علّه
وأشبه بقصة عزيز اللي ولد خاله=ماهيب قصّة غرام وخل مع خلّه
نهار طاح الحصان وطاح خيّاله=وإنقض فوقه غراب البين وإحتلّه
صبري تعدّى الحدود وشدّت رحاله=عايف من الدار مايبغى لها شلّه
وأعذرت من شرب كيفٍ صدّت دلاله=كرهت شربه بعد ماجيت فالحلّه
لو مرنّي دولها عدّيت فنجاله=للي يريده وأنا وش عاد أجامل له
بعد الحصون الزبينة راحت إدباله=وأطلالها في جماد القاع منهلّه
الله ولا حصن يقصر عنّي ظلاله=كم يوم والشمس تلحقني تحت ظلّه
من لادرى شرهتي ماتكرم سباله=آطا على شرهته بالرجل وأزلّه