يسبح بي التفكير في كل الاقطار = احيان اهدي فيه واحيان اصحيه
الطير طار وعايشٍ وين ما طار = وانا كسير اجناح والهم اراعيه
لا لا تقولي ما بقى في قنطار = دمعي نثرته واحرق الخد ناشيه
اكيد انا معذور والهم بيطار = يقودني وانا من الغبن اتليه
كني شواوي ينتظر وبل الأمطار = وإلا ضعيف ولا لقى من يعشيه
وإلا فقير الحال ما شب له نار = عامين ما يجمع من الزاد يعطيه
وإلا كما رجل من الدين عسار = واللي يبي ماله حلف ما يخليه
لي موقفٍ بالحب والحب كسار = يكسر قلوب ويجبر اقلوب تحييه
ياللي بنيت الحب لا تخرب الدار = عمار دار الحب في قلب راعيه
اسكن بقلبي جعل تفداك الاعمار = لك مسكنٍ بالقلب محدٍ سكن فيه
ارعى نجوم الليل والليل بشار = ونور القمر لا غاب نورك يكفيه
إن ضاع حبك قلت ودوني اشهار = قرار صادر لو عن الناس مخفية
وإن جاء غرامك مثل نبتات الازهار = جلست اشم الورد واقوم واسقيه
من لا عرف للحب قيمه ومقدار = هذاك ما للحب عنده مشاريه
اخر كلامي قلت والقلب صبااار = الله يخلي قلب غالي لمغليه