| محمد الذيابـــي |
12-Mar-2011 07:49 PM |
حظوظ وتوافيق
عقب البطا والبعد والعلم توثيق = سلام تسليمٍ يفوق الوصافه
عبر الفضا مرسول مع فكة الريق = ومطبوع في صفحات كل الصحافه
من قلب مخلص ما دخل فيه تلفيق = تحمل معانيه الوفا والطرافه
يرسل لابن غزاي نسل المطاليق = ولا همته طول السفر والمسافه
سمعت لك بيتين تشكي من الضيق = وقلت الزمن قاسي ولابه ريافه
ودقت هواجيسي بوسط المعاليق = وهيضني شعور الحفيزه وقافه
ياصاحبي والوضع يحتاج تعليق = وشكوى لغير الله ذل وحسافه
احيان أطيق الصبر واحيان ماطيق = واحيان امشيها كذا بالحرافه
واحيان اشوف الوضع يحتاج تدقيق = وقتٍ مقلب فيه طيب وصلافه
والحظ يرقد عام واحياناً يفيق = وان فاق ماطول وكبر لحافه
دبرة ولي العرش رب المخاليق = اللي عليه المشتكى والمخافه
ومدامها صارت حظوظ وتوافيق = الله يمنعنا من اللي نعافه
|
