الهيـــــــــــــلا *** منتدى قبيلة عتيبة

قصيدة القيت مؤخراً في حفل الأستاذ / سلطان بن سهيل الذيابي لمشايخ وأعيان قبيلة عتيبه ومنسوبي مستشفى الملك خالد للحرس الوطني بجده من مدنيين وعسكريين وأطباء.

العالــــم الله والخفايــــــا بصنــــــدوق
والشعــر وبله مثل وبل الغمامـــه

الشعـر سبك وحبك معنــــــى ونطوق
واللــــــــي سبك معناه زاده زعامه

يقــــــدح من أفكـــــارٍ فريده لها ذوق
يطــــرب لها السامـع وتبقى علامه

ولا كــل من زين كلامــــــه بطاروق
أصبح مع الشعـــــــــار عالي مقامه

لا والذي زين سمـــــــا نجــــد ببروق
ماهـــــــوب صادق لـــو كثر كلامه

أقولها والقــــــــول ثابت وماثــــــــوق
خل الهدف واضــح وتكسب وسامه

ياريبعي الهيــــــــلا هل الخيل والنوق
واهل الفعــــــول الساميه والشهامه

وأهــل الكمـال ان كان فالماقف حقوق
واهل الرمـــاح ان عودت للضرامه

يادرع جنبي لن غدى الوقت مصفوق
مايقهـــــر الرجــــــــال وانتم حزامه

الحاقد اقفـــــــــى خافقه حيل محروق
والا الجبــــان ازرت تشيــله عظامه

والفضل للــــــــــي عزنا والسما فوق
والمجد مانرضــــى يكـــــود بسنامه

يهزنـــــــــي في طاري عتيبه الشوق
وفـــــــي مدح ربعي مالحقني ملامه

هذي حقايق مابها شــــــــــــي ملفوق
تاريخنا واضــــــح ولابـــــــــه ندامه

والله مدام الجســــــــــم به دم وعروق
يبقـــــــــى غلا ربعي على كل هامه

يامنتدى الهيـــــلا ترى الباب مطروق
من الوطــــــــن شرقه وغربه وشامه

خلك سنــــــــود الله يجيرك من العوق
وحنا معك باللــــــــــــي تباه وترامه

ياكثــــر زوارك ملايين وتفــــــــــوق
ولـــــــــولا الثقه ماجوك عامه بعامه

وصلاة ربــــــــي عد ماطاف مخلوق
فــــي مكه العظمــــــى ولابس حرامه

علـــــــــــى محمد سيد الخلق ونسوق
ازكـــــــــــى صلاة الله عليه وسلامه