قصيده لمحمدالسديري
 

بسم الله الرحمن الرحيم



يقول من عدا على رأس عالي=رجمن طويلن يدهله كل قرناس

في راس مرجو من عسير المنالي=تلعب به الأرياح مع كل نسناس

في مهمهن قفرن من الناس خالي=يشتاق له من حس بالقلب هوجاس

قعدت في راسه وحيدن لحالي= براس الطويل ملا بقه تقل حراس

متذكرن في مرقبي وش غدالي=وصفقت بالكفين ياس على ياس

أخذت اعد ايامها والليالي=دنيا تقلب ما عرفنا لها قياس

كم فرقت ما بين غالي وغالي=لو شفت منها ربح ترجع للافلاس

ياما هفا به من رجال مدالي=ماكنهم ركبوا على قب الافراس

ولا قلطوهن للكمين الموالي=ولا صار فوق ظهورهن قطف الأنفاس

ولا ردد واصم الرمك للتوالي=كلن يبي من زايد الفعل نوماس

من بينهم سمر القنا والسلالي=مثل البروق برايحن ليله أدماس

يقطعك دنيا مالها اول وتالي=لو اضحكت للغبن تقرع بالأجراس

المستريح اللي من العقل خالي=ما هو بلجات الهواجس غطاس

ما هو بمثلي مشكلاته جلالي=ازريت اسجلهن بحبرن بقرطاس

حملي ثقيل وشايله باحتمالي=واصبر على مر الليالي والاتعاس

وارسي كما ترسي رواسي الجبالي=ولا يشتكي ضلع عليه القدم داس

يا بجاد شب النار وادن الدلالي=واحمس لنا يا بجاد ما يقعد الراس

ودقة بنجرن يا ظريف العيالي=يجذب لنا ربعن على اكوار جلاس

وزله ليامنه رقد كل سالي=وخله يفوح وقنن الهيل بقياس

وصبه ومده يا كريم السبالي=يبعد همومي يوم اشفه بالانفاس

فنجال يغدى ما تصور إببالي=روابع ناخذ بها اخماس واسداس

لا خاب ظني بالرفيق الموالي=مالي مشاريهن على نايد الناس

يا عل قصرن ما يجي له ظلالي=ينهار من عالي مبانيه للساس

لا صار ما هو مدهل للرجالي=وملجا لمنهو يشكي الظيم والباس

بحسناك يا منشي حقوق الخيالي=يا خالق اجناس ويا مفني اجناس

تجعل مقره دراس العهد بالي=صحصاح دو دارس ما به اوناس

البوم في تالي هدامه ايلالي=جزاك يا قصر الخنا وكر الانداس

مته تربع دارنا والمفالي=وتخضر افياض عقب ما هي ابيباس

نشوف فيها الديدحان متوالي=مثل الرعاف بخصر مدقوق الالعاس

وينثر على البيدا سوات الزوالي=يشرق حماره شرقة الصبغ بالكاس

وتكبر دفوف معبسات الشمالي=ويبني عليهن الشحم مثل الأطعاس
القصيده لــ محمد السديري

الله يرحمــــــــــــــــه


لاهنت