حاولت أقنع خاطري عنك وأنساك=يامن سكن وسط الكفن باللحودي
لكن قلبي ما قوى الصبر يسلاك =أبكي ودمع العين جرح خدودي
أبكي لما صابك وموتك وفرقاك=والله عليه من خيار الشهودي
ما غيبتك غيبة سفر وآتحراك =غيبتك غيبت غايب ٍ مايعودي
الله يجعل جنة الخلد ماواك= يكتب لك الجنه مقر الخلودي
اقوال من صاحبك حبك وخاواك= وأنت الرفيق اللي بفعلك تجودي
في موقف ٍ غصب ٍ تقول العرب ذاك= قطع القلوب أبصر بكي الكبودي
الله وهبك العقل والفكر وأعطاك= عطوى جزيله ما عطاها حسودي
مطلق لسان إيطوع القول لرضاك =فوق أجود الحبلين مرقى السنودي
الفكر والتمييز فاكثر مزاياك=بعدك موت القايمين القعودي
ومن لا يعرفك حين بالعين يراك= يقول اسد ومن عيال الأسودي
كسبت ذكر الطيب في أيام دنياك = يذكرك من لاهو بخيل ٍ جحودي
مرسي جبل ما احد قدر قال يرقاك =والناس ما تكسر حصاة بعودي
بحر غزير الموج ما ينتهي ماك =واللي سبح به ما عرف له حدودي
فرحة صديق طاب فاله وحياك= لو كان لا حاضر ولا في الوجودي
واليوم وينك ما بقي غير ذكراك = اسم أنبنى وأصبح جدار مهدودي
ما فادنا لو طول الأيام ننعاك =دايم سهارى والخلايق رقودي
الموت قافينا وما شين ممشاك=مابه شجيع ولا مبقي شرودي