يوم الطمع دونه رمـاح وبواريـد=والنذل تنشب كلمـته فـي وريـده
الحر يفـرس والحبـاري مجاليـد=يعرف بهـا الطيـب منيـا بديـده

أمس الضحى عديت في نايف الحيد=مابين شعر وبيـن خشـم الفريـده
مثلي على المبـدا يحـده حواديـد=يصمد وراع الهم مالـه صميـده
يسوقه الهاجوس سـوق المعاويـد=كنّه بضيقه فوق حـام الوقيـده
هـمٍ يقـدد ثومـة القلـب تقديـد=يهنيكم ياهـل القلـوب البليـده
لو اني ارقد نومي بعـض السلابيـد=ماشفت حالـي ناحـلٍ كالجريـده
النـوم للـي مايحسـب المناقيـد=ماهمـه الا كيـف يمـلا مسيـده
لاناطـحٍ قالـه ولا جايـبٍ فـيـد=واليا فتـح عينـه لقاهـا رغيـده
راحو وخلوه الرجـال الصناديـد=قـرنٍ لحقتـه مابقالـه شـريـده
يوم الطمع دونه رمـاح وبواريـد=والنذل تنشب كلمـته فـي وريـده
الحر يفـرس والحبـاري مجاليـد=يعرف بهـا الطيـب منيـا بديـده
مايعرفون ابها هل الحسـد والكيـد=ولا يفتخر راع الرصيد ابرصيده
وليا اختلف سلم العـرب والتقاليـد=من مـات منهـم لا تعـده فقيـده
لو هو قريبٍ منك فرقا الردي عيد=جعله مـن الدنيـا يعّجـل شديـده
يعيش معزولٍ عن النـاس ووحيـد=اخير من قـرب الوجيـه القريـده
يومنّي اذكر بعض الاحوال يا فهيد=الوقت جافـي والمـوارد زهيـده
وان حدّت الحاجه لبعض الرعاديـد=اليـوم ماينفـع عضيـدٍ عضـيـده
نفسي معودها على الصبر تعويـد=والصبر نكسبـّه صفـاتٍ حميـده
وخير الكلام الذكر من غير تحديـد=مع خالص النيه وطيـب العقيـده
يقوله اللـي مانشـد زيـد وعبيـد=فالمصحف الطاهر لقا مايفيـده
من طبّق اللي فيه نـال المقاصيـد=وسلك طريق اهل الحياة السعيـده
مايستوون اهل القشـر والاجاويـد=الله فرقهـم فـي امـورٍ عـديـده
قال اعملو تلقـون ولكـم مواعيـد=اجل قصير ومن قضى اجله نعيـده
مرجاعهـم لله جمـوع وتفـاريـد=والله بخلقـه يفعـل اللـي يريـده
دنيـاك مافيهـا حيـاةٍ صرامـيـد=زرع الفنا لابد لـه مـن حصيـده
من سار فالسكة وصل لآخر السيد=العبـد لابـد المنـايـا تصـيـده
تـرى المنايـا للبرايـا حواصيـد=والموت له مع كل نفـسٍ وعيـده
الرابح اللي من هل الخير وشْهِيـد=وادرك بحسن الخلق مرضاة سيده
حبلـه يـوّرد طيّبـات المواريـد=لا صار مع ربـه حبالـه جويـده
والحكم للي يبـدي الخلـق ويعيـد=هو ربنا الواحـد وحنـا عبيـده