راع الهوى ياهل الهوى مايلامي= يشكي الغرام وحاجته ما شرحا
حالي طواه إهيام حب وغرامي=على عشير(ن) عن عيوني تنحا
خل(ن) طواني بالهوى طي خامي=وليا بغيته صد عني وشحا
وهيه هوى بالي وغاية مرامي=والمسعد اللي بالنظر ما لمحا
لبست على تاج الجمال الوسامي=مزيونة(ن) ربي بزينه ملحا
عذبت قلبي ياضبي العدامي=حبك برى حالي وكبدي جرحا
حبك بقلبي ملحم(ن) به لحامي=وروحي على حوض المنايا طرحا
ياعود موز(ن) ناعم(ن) بالمقامي=في فية(ن) حر الهوى مالفحا
فيه الحلا كله وحلو الكلامي=عقبه يصيرون العليلين أصحا
من لايعاشر مثلها بالتمامي=خسر حياته كلها ما ربحا
له شفت(ن) ما شوهت بالوشامي=واهني من ياخذ شوي ورشحا
من ذاقها لو كان جوعان ضامي=يرتاح والنفس إيتزايد فرحا
وإليا ذكرته في لذيذ المنامي=ناديت باسمه لين حلقي تسحا
شقر(ن) جدايلها تعدى الحزامي=تطرح سهوم عيونها من سنحا
ونهود في صدر الحبيب زوامي= بيض(ن) كما بيض الحمام المدحا
جوابها يهجي بليا طعامي= الله عطاها من حلاه ومنحا
ياليتني وإياه دايم ليامي=اسمع حديث إحبيبي وأتوحا
ودي بقربه مار دونه حوامي=كلب(ن) ليا شاف الطراقي نبحا
الحب أخذ قدمي رجال(ن) كرامي=إشيوخ قوم(ن) من عرفها مدحا
الشمري وابن الدجيما ونامي=وقدامهم ناس(ن) بعيد(ن) شبحا
يلومني فالحب خطو الخمامي=خبل(ن) ما يفهم نعنبو ذا الملحا
عسى عيونه للرمد والسقامي= يموت واهيه ما برت من وضحا
وجدي على لاماه وجد الظوامي= وجد القطيع اللي على الما ملحا